ST Bus Revenue: उन्हाळ्याच्या सुट्ट्यांचा काळ महाराष्ट्र राज्य मार्ग परिवहन महामंडळाच्या (एसटी) पुणे विभागासाठी अत्यंत लाभदायक ठरला आहे. एप्रिल आणि मे या अवघ्या दोन महिन्यांत पुणे विभागाने तब्बल १४१ कोटी रुपयांचा महसूल मिळवत कमाईचा नवा विक्रम प्रस्थापित केला आहे. विशेष म्हणजे, गेल्या वर्षीच्या याच कालावधीच्या तुलनेत यंदा उत्पन्नात १४ कोटी रुपयांची वाढ झाली असून, या बंपर कमाईमुळे पुणे विभाग पूर्णपणे नफ्यात आला आहे. शिक्षण आणि नोकरीनिमित्त पुण्यात वास्तव्यास असलेले हजारो नागरिक उन्हाळी सुट्ट्यांमध्ये आपल्या गावी परतल्याने एसटी प्रवाशांच्या संख्येत मोठी वाढ झाली.
वाढत्या प्रवासी संख्येमुळे महसुलात झपाट्याने वाढ
उन्हाळा जसजसा वाढत गेला, तसतशी एसटीच्या महसुलातही लक्षणीय वाढ होत गेली. मार्च महिन्यात ६६ लाख ३२ हजार प्रवाशांनी एसटीने प्रवास केला आणि त्यातून ५७ कोटी ९७ लाख रुपयांचे उत्पन्न मिळाले. एप्रिल महिन्यात प्रवाशांची संख्या ६८ लाखांवर पोहोचली आणि महसूल ६३ कोटी रुपयांपर्यंत वाढला. तर मे महिन्यात, जो उन्हाळी सुट्ट्यांचा पीक कालावधी मानला जातो, कमाईने सर्व विक्रम मोडत थेट ७४ कोटी रुपयांचा टप्पा गाठला. गेल्या वर्षी मे महिन्यात ६३ कोटी रुपयांचे उत्पन्न झाले होते, त्यामुळे यंदाची वाढ विशेष उल्लेखनीय ठरली आहे.
विदर्भ, मराठवाडा आणि पश्चिम महाराष्ट्र मार्गांवर हाऊसफुल्ल गर्दी
पुण्यातून उन्हाळी सुट्ट्यांसाठी गावी जाणाऱ्या प्रवाशांचा सर्वाधिक ओघ विदर्भ आणि मराठवाड्याकडे होता. या मार्गांवर प्रचंड गर्दी होत असल्याने महामंडळाने विशेष बसेसची व्यवस्था केली होती. स्वारगेट, शिवाजीनगर आणि वल्लभनगर (पिंपरी-चिंचवड) या प्रमुख बसस्थानकांवरून विदर्भ आणि मराठवाड्यासह कोल्हापूर, सांगली आणि सोलापूर या मार्गांवरही अतिरिक्त बसेस सोडण्यात आल्या. सध्या पुणे विभागाकडे ९२० बसेस असून दररोज सरासरी १ लाख ८० हजार प्रवासी एसटी सेवांचा लाभ घेत आहेत.
नियोजनाला प्रवाशांचा उत्स्फूर्त प्रतिसाद
प्रवाशांची वाढती संख्या लक्षात घेऊन बसस्थानकांवर पिण्याच्या पाण्याची सुविधा, स्वच्छता व्यवस्था आणि अतिरिक्त कर्मचाऱ्यांची नियुक्ती करण्यात आली होती. या सर्व नियोजनाला प्रवाशांचा चांगला प्रतिसाद मिळाल्याने महसुलात मोठी वाढ झाल्याचे अधिकाऱ्यांनी सांगितले.
