जालना: मराठा नेते मनोज जरांगे पाटील यांनी मंत्री छगन भुजबळ यांच्या ‘अशिक्षित’ टीकेला जोरदार प्रत्युत्तर दिले आहे. त्यांनी शुक्रवारी अंकुशनगर येथील निवासस्थानी माध्यमांशी बोलताना म्हटले, ‘मी जरी अशिक्षित असलो तरी तुम्हाला रडकुंडीला आणले. तुम्हाला मराठ्यांना आरक्षण मिळू द्यायचे नव्हते, पण त्या विचारांवर मी पाणी फिरवले. मी अशिक्षित असतानाही जर तुम्हाला रडकुंडीला आणले, तर आमचे सुशिक्षित लोक बोलायला लागले तर त्याचा परिणाम काय होईल, याचा विचार करा. भुजबळांना हे माहीत आहे की मी अशिक्षित आहे की सुशिक्षित, पण त्यांना सुधारता येत नाही.’
दरम्यान, यावेळी जरांगे पाटीलने मराठा आमदार आणि खासदारांना स्पष्ट भूमिका घेण्याचे आवाहन केले. त्यांनी सांगितले की, मराठ्यांच्या सर्व नेत्यांनी ठामपणे सांगावे की आम्हाला 10 टक्के SEBC आरक्षण हवे, पण ते 50 टक्क्यांच्या आत OBC आरक्षणात असावे. तथापी, वंचित बहुजन आघाडीचे नेते प्रकाश आंबेडकर यांच्या वक्तव्यावरही त्यांनी प्रतिक्रिया दिली. जरांगे म्हणाले की, ‘मी प्रकाश आंबेडकर यांचा आदर करतो, पण भारतरत्न डॉ. बाबासाहेब आंबेडकरांच्या वंशज म्हणून जातीय भेदभाव टाळला पाहिजे. सल्ला दिला तर तो ऐकावा, पण कोणत्याही जातीविरोधात संदेश जाऊ नये.’
तथापी, ओबीसी समाजातील तरुणाच्या आत्महत्येवर बोलताना जरांगे भावूक झाले. मराठा असो की OBC, कोणत्याही गरीब लेकराने आत्महत्या करू नये. राजकीय नेते अशा घटनांवर लगेच राजकारण करतात. आम्ही त्या कुटुंबाच्या दुःखात सहभागी आहोत, पण लोकांच्या जीवनावर राजकारण करू नये, असं भावनिक आवाहनही यावेळी जरांगे पाटील यांनी केलं.
