केज (बीड): मस्साजोगचे सरपंच संतोष देशमुख यांच्या हत्या प्रकरणातील मुख्य आरोपी सुदर्शन घुले आणि सुधीर सांगळे यांना पुण्यातून अटक करण्यात आली होती, तर त्यांना मदत करणाऱ्या आणखी एका आरोपीला देखील अटक करण्यात आली आहे. दरम्यान सदर आरोपींना पोलिसांकडून केज न्यायालयात हजर केल्यानंतर तीनही आरोपींना 14 दिवसांची पोलीस कोठडी न्यायालायने दिली आहे.
दरम्यान आरोपींना 15 दिवसांची पोलीस कोठडी देण्यात यावी, अशी मागणी सीआयडीच्या एसआयटी टीमकडून केज न्यायालयात करण्यात आली. अटक केलेले हे सर्वजण टोळीने गुन्हे करणारे आरोपी आहेत. संघटित गुन्हे तसेच दहशत निर्माण करणे आणि जिल्ह्यात नवीन व्यवसाय करायला आलेल्या कंपन्यांना धमकावणे हा यांचा पेशा आहे. तीनही आरोपींना संतोष देशमुख यांच्या हत्येचा अजिबात पश्चाताप नाही. सरपंच संतोष देशमुख यांचा खून सर्वांनी एंजॉय केला आहे. त्यामुळे आता या आरोपींना आळा घालणे गरजेचे आहे. तपासासाठी आरोपींना 15 दिवसांची पोलीस कोठडी देण्यात यावी, असा युक्तीवाद सरकारी वकिलांकडून कोर्टात करण्यात आला.
तर दुसरीकडे आरोपींच्या कोठडीसाठी एसआयटी टीमकडे आवश्यक असलेलेले मुद्दे पुरेसे नाहीत. सदर गुन्ह्यांमध्ये सर्व आरोपींना अटक करण्यात आली आहे. विष्णू चाटेला देखील यापूर्वीच अटक करण्यात आलेली आहे. डिजिटल एव्हिडन्स मिळाले आहेत, असे पोलीस म्हणत आहेत. तसेच आरोपींना केलेल्या कृत्याचा पश्चाताप नाही, असे म्हणता येणार नाही, असा युक्तिवाद आरोपींच्या वकिलांनी कोर्टात केला. दरम्यान न्यायालयाने दोन्ही बाजूंचा युक्तिवाद ऐकल्यानंतर आरोपींना 14 दिवसांची पोलीस कोठडली दिली आहे.
