मुंबई : विधानपरिषदेवर बिनविरोध निवडून आल्यानंतर आमदार ओमप्रकाश उर्फ बच्चू कडू यांच्यावर आता आणखी एक मोठी राजकीय जबाबदारी सोपवण्यात आली आहे. उपमुख्यमंत्री एकनाथ शिंदे यांनी बच्चू कडू यांची शिवसेनेच्या विदर्भ विभागीय नेतेपदी नियुक्ती केली आहे.
विदर्भाच्या राजकारणात नवी समीकरणे
विदर्भातील आक्रमक आणि जनआधारित नेता म्हणून ओळख असलेल्या बच्चू कडू यांच्या नियुक्तीमुळे राजकीय वर्तुळात चर्चांना उधाण आले आहे. शिवसेनेची संघटनात्मक ताकद वाढवण्यासाठी आणि आगामी निवडणुकांच्या पार्श्वभूमीवर पक्षबांधणी मजबूत करण्यासाठी त्यांच्याकडे महत्त्वाची जबाबदारी सोपवण्यात आल्याचे सांगितले जात आहे.
सामान्यांच्या प्रश्नांवर आक्रमक भूमिका
बच्चू कडू हे शेतकरी, दिव्यांग, बेरोजगार आणि सर्वसामान्यांच्या प्रश्नांवर सातत्याने आक्रमक भूमिका घेणारे नेते म्हणून ओळखले जातात. आंदोलनांच्या माध्यमातून त्यांनी राज्यभरात स्वतःची वेगळी ओळख निर्माण केली आहे.
विदर्भात पक्षविस्ताराची जबाबदारी
सूत्रांच्या माहितीनुसार, विदर्भातील जिल्ह्यांमध्ये शिवसेनेची संघटना मजबूत करणे, पक्षविस्तार करणे आणि स्थानिक पातळीवर कार्यकर्त्यांना सक्रिय करणे, या उद्देशाने बच्चू कडूंवर ही जबाबदारी सोपवण्यात आली आहे.
“ही केवळ पदाची नाही, संघर्षाची जबाबदारी”
नियुक्तीनंतर बच्चू कडू यांनी सोशल मीडियावर भावना व्यक्त करत एकनाथ शिंदे आणि पक्ष नेतृत्वाचे आभार मानले. “ही केवळ पदाची जबाबदारी नसून शेतकरी, शेतमजूर, दिव्यांग, युवक आणि वंचितांसाठी अधिक ताकदीने लढण्याची संधी आहे,” असे त्यांनी म्हटले.
गटबाजीला थारा नाही
बच्चू कडू यांनी स्पष्ट शब्दांत सांगितले की, “माझी नियुक्ती पद वाटपासाठी नाही तर सच्च्या शिवसैनिकांना न्याय देण्यासाठी आहे. विदर्भात गटबाजीला थारा दिला जाणार नाही.”
शिवसेनेला विदर्भात बळ मिळणार?
ग्रामीण भागात आणि शेतकरी वर्गात बच्चू कडू यांचा प्रभाव मोठा मानला जातो. त्यामुळे त्यांच्या नियुक्तीमुळे शिवसेनेला विदर्भात राजकीय बळ मिळण्याची शक्यता व्यक्त केली जात आहे.
