Local Body Election : महाराष्ट्रातील नगरपरिषद व नगरपंचायत निवडणुकीच्या निकालाबाबत नागपूर खंडपीठाने आज (२ डिसेंबर २०२५) महत्त्वपूर्ण निर्देश दिले असून, उद्याची (३ डिसेंबर) मतमोजणी रद्द करण्यात आली आहे. राज्यात आज (२ डिसेंबर) २४२ नगरपरिषद व ४६ नगरपंचायतींमध्ये मतदान पार पडले असले तरी, काही ठिकाणी आरक्षणाच्या मुद्द्यांमुळे २० डिसेंबरला प्रलंबित असलेल्या २० हून अधिक निवडणुकांचा निकाल एकाच वेळी जाहीर करण्यात येईल.
यामुळे सर्व उमेदवारांचे भवितव्य २१ डिसेंबरला स्पष्ट होईल. हा निर्णय सुप्रीम कोर्टाच्या ३१ जानेवारी २०२६ पर्यंत सर्व स्थानिक निवडणुका पूर्ण करण्याच्या आदेशानुसार घेण्यात आला आहे. खंडपीठाने याचिकाकर्त्यांच्या युक्तिवादावर सुनावणी घेतल्यानंतर असा निर्णय दिला. याचिकेत म्हटले होते की, आज झालेल्या मतदानाचा निकाल आधी जाहीर केल्यास प्रलंबित निवडणुकांवर परिणाम होऊ शकतो, ज्यामुळे त्या निवडणुकांना न्याय मिळणार नाही.
न्यायालयाने हे मत मान्य करत सर्व निकाल २१ डिसेंबरला एकाच दिवशी जाहीर करण्याचे आदेश दिले. तसेच, एक्झिट पोल जाहीर करण्यास मनाई केली असून, आदर्श आचारसंहिता २० डिसेंबरपर्यंत कायम राहील. पुढील सुनावणी १० डिसेंबरला होईल, तर राज्य निवडणूक आयोग व शासनाला नोटीस बजावून उत्तर दाखल करण्याचे सांगितले आहे.
