मुंबई : महाराष्ट्रातील नगरपरिषद आणि नगरपंचायत निवडणुकांमध्ये (२ डिसेंबरला) भाजप आणि शिवसेना (शिंदे गट) यांच्यात टोकाचे आरोप-प्रत्यारोप झाले. ‘ऑपरेशन लोटस’ सारख्या कथित रणनीतींमुळे युती तुटण्याच्या चर्चा रंगल्या, पण निवडणूक संपताच महायुतीने ‘हम साथ साथ है’चा नारा दिला. भाजप प्रदेशाध्यक्ष रवींद्र चव्हाण यांनी स्पष्ट केलं की, हे आरोप फक्त निवडणुकीपुरते होते. आता मुख्यमंत्री देवेंद्र फडणवीस शिंदे आणि चव्हाणांसाठी ‘डिनर डिप्लोमसी’ आयोजित करणार असून, यामुळे वादावर पूर्णपणे पडदा पडेल, असं चव्हाण यांनी संकेत दिले.
निवडणूक जाहीर झाल्यानंतर महायुतीत खरा संघर्ष पेटला तो पदाधिकाऱ्यांच्या ‘पक्षबदल’मुळे. भाजप प्रदेशाध्यक्ष रवींद्र चव्हाण यांना ‘पक्षप्रवेश प्रदेशाध्यक्ष’ म्हणून पाहिलं जातंय, कारण त्यांनी कल्याण-डोंबिवलीसह ठाणे, रायगड, सिंधुदुर्ग, हिंगोली, बुलढाणा भागात शिंदे सेनेच्या अनेक पदाधिकाऱ्यांना भाजपमध्ये सामील केलं. यावरून शिंदे सेनेतून संताप व्यक्त झाला. सिंधुदुर्गात शिवसेना आमदार निलेश राणे यांनी भाजप कार्यकर्त्याच्या घरी ‘कॅश वाटप’चा स्टिंग ऑपरेशन केलं आणि चव्हाणांवर मतदार भ्रष्टाचाराचा आरोप केला.
डिनर डिप्लोमसी वादावर अंतिम पडदा
निवडणुकीनंतर फडणवीस शिंदे आणि चव्हाणांसाठी खास डिनर आयोजित करणार असल्याचं चव्हाण यांनी सांगितलं. “हे डिनर वाद सोडवण्यासाठी आणि युती मजबूत करण्यासाठी असेल. मुंबई महापालिका निवडणुकीत एकजुटीने लढू,” असं ते म्हणाले. ही ‘डिप्लोमसी’ महायुतीला नवं बळ देईल, असं राजकीय अभ्यासक सांगतात. विरोधक याचा फायदा घेण्याचा प्रयत्न करत असले तरी, फडणवीसांच्या नेतृत्वाने युती टिकवली, असं मत आहे.
