Narhari Zirwal : राज्याचे मंत्री नरहरी झिरवळ यांचा कथित व्हिडिओ व्हायरल झाल्यानंतर निर्माण झालेल्या वादात आता पहिली कायदेशीर कारवाई करण्यात आली आहे. मुंबईतील कफ परेड पोलिस ठाण्यात याप्रकरणी एफआयआर दाखल करण्यात आला असून, तृतीयपंथीय व्यक्तीच्या तक्रारीवरून तिच्या भावाविरोधात गुन्हा नोंदवण्यात आला आहे.
मिळालेल्या माहितीनुसार, आरोपीने अन्न व औषध प्रशासन विभागात नोकरी लावण्याची मागणी केली होती. मागणी पूर्ण न झाल्यास संबंधित व्हिडिओ व्हायरल करण्याची धमकी दिल्याचा आरोप एफआयआरमध्ये करण्यात आला आहे. तसेच व्हायरल झालेला व्हिडिओ मूळ नसून त्यात छेडछाड केल्याचा दावा करण्यात आला आहे.
या प्रकरणी पोलिसांनी भारतीय न्याय संहितेच्या कलम ७९ आणि ३५१(१) तसेच माहिती तंत्रज्ञान कायद्यांतर्गत गुन्हा दाखल केला आहे. बदनामी, गोपनीयतेचा भंग आणि धमकावणे यांसारख्या गंभीर आरोपांवरून तपास सुरू आहे.
दरम्यान, या व्हिडिओमुळे राजकीय वर्तुळात खळबळ उडाली असून विरोधकांकडून झिरवळ यांच्या राजीनाम्याची मागणी होत आहे. स्वतः झिरवळ यांनी व्हिडिओ एडिट करून व्हायरल केल्याचा दावा केला आहे.
मुख्यमंत्री देवेंद्र फडणवीस यांनीही या प्रकरणाची दखल घेत व्हिडिओची सत्यता तपासली जाईल आणि त्यानंतरच पुढील निर्णय घेतला जाईल, असे स्पष्ट केले आहे. त्यामुळे या प्रकरणातील पुढील घडामोडींवर सर्वांचे लक्ष लागले आहे.
