IAS Sanjiv Hans : वरिष्ठ आयएएस अधिकारी संजीव हंस यांच्याविरोधात मोठा भ्रष्टाचाराचा आरोप समोर आला असून, १ कोटी रुपयांची लाच घेतल्याप्रकरणी त्यांच्यावर गुन्हा दाखल करण्यात आला आहे. या प्रकरणामुळे प्रशासकीय वर्तुळात मोठी खळबळ उडाली आहे.
माहितीनुसार, संजीव हंस हे केंद्र सरकारच्या ग्राहक व्यवहार, अन्न व सार्वजनिक वितरण मंत्रालयात मंत्र्यांचे खाजगी सचिव म्हणून कार्यरत होते. त्यांनी काही सहकाऱ्यांच्या मदतीने मुंबईतील नामांकित बिल्डर्सकडून अनुकूल निर्णय मिळवून देण्याच्या बदल्यात लाच मागितल्याचा आरोप आहे.
या प्रकरणात विपुल बन्साल यांनी मध्यस्थाची भूमिका बजावल्याचे सांगितले जात आहे. त्यांनी अनुभव अग्रवाल यांची संजीव हंस यांच्यासोबत भेट घडवून आणली. त्यानंतर राष्ट्रीय ग्राहक विवाद निवारण आयोगात (NCDRC) संबंधित बिल्डरच्या बाजूने अनुकूल तारखा मिळवून देण्यात आल्या, तसेच अटकेपासून दिलासा मिळवून देण्यात मदत केल्याचा आरोप आहे.
या बदल्यात, ठरल्याप्रमाणे १ कोटी रुपयांची रक्कम विपुल बन्सल यांच्या माध्यमातून संजीव हंस यांना देण्यात आल्याचे तपासात समोर आले आहे.
या प्रकरणी संजीव हंस यांच्यासह विपुल बन्सल, अनुभव अग्रवाल आणि इतर काही व्यक्तींविरुद्ध गुन्हा नोंदवण्यात आला आहे. तपासाची जबाबदारी सीबीआयकडे सोपवण्यात आली असून, पुढील कारवाईकडे सर्वांचे लक्ष लागले आहे.
