मुंबई : महाराष्ट्राच्या राजकारणात आज मोठी उलथापालथ होण्याची शक्यता असून, शिवसेना (उद्धव बाळासाहेब ठाकरे) गटातील ओमराजे निंबाळकर यांच्यासह सहा खासदार मुख्यमंत्री एकनाथ शिंदे यांच्या शिवसेनेत प्रवेश करणार असल्याची माहिती समोर आली आहे. दुपारी ३ वाजता हा महत्त्वाचा पक्षप्रवेश सोहळा पार पडण्याची शक्यता असून, त्यामुळे ठाकरे गटाला मोठा धक्का बसू शकतो.
मिळालेल्या माहितीनुसार, बंडखोर खासदारांचा गट शिंदे यांच्या नेतृत्वाखालील शिवसेनेत विलीन होणार आहे. या घडामोडीमुळे पक्षांतरबंदी कायद्याअंतर्गत अपात्रतेचा धोका टाळण्यासाठी आवश्यक असलेले दोन-तृतीयांश संख्याबळ या गटाकडे उपलब्ध होणार आहे.
कोण आहेत बंडखोर खासदार?
ओमराजे निंबाळकर
नागेश पाटील आष्टीकर
संजय दीना पाटील
संजय देशमुख
संजय जाधव
भाऊसाहेब वाकचौरे
ठाकरेंची तातडीची बैठक
या राजकीय घडामोडींच्या पार्श्वभूमीवर उद्धव ठाकरे यांनी आज दुपारी नरिमन पॉईंट येथील ‘शिवालय’ कार्यालयात पक्षाच्या आमदार आणि विधान परिषद सदस्यांची तातडीची बैठक बोलावली आहे. पावसाळी अधिवेशनाच्या पहिल्याच दिवशी ही बैठक होत असल्याने तिच्याकडे राजकीय वर्तुळाचे लक्ष लागले आहे.
आष्टीकरांचा दावा
खासदार नागेश पाटील आष्टीकर यांनी प्रतिक्रिया देताना सांगितले की, “१८ जूनपर्यंत आम्ही कोणताही निर्णय घेतला नव्हता. मात्र त्यानंतर आमच्याविरोधात झालेल्या वक्तव्यांमुळे आम्हाला वेगळा निर्णय घ्यावा लागला.”
राजकारणात नवा अध्याय?
ठाकरे गटाकडे सध्या ९ लोकसभा खासदार आहेत. त्यापैकी ६ खासदारांनी वेगळी भूमिका घेतल्यास हा ठाकरे गटासाठी मोठा राजकीय धक्का मानला जात आहे. दुसरीकडे, शिंदे गटाची संसदीय ताकद वाढणार असून महाराष्ट्राच्या राजकारणात नव्या समीकरणांची चर्चा सुरू झाली आहे.
