KEM Hospital : परळ येथील पालिकेच्या केईएम रुग्णालयात आज सकाळी प्रचंड तणावाचे वातावरण निर्माण झाले. उपचारादरम्यान रुग्णाचा मृत्यू झाल्याच्या कारणावरून मृताच्या नातेवाईकांनी कर्तव्यावर असलेल्या परिचारिका (नर्स) आणि सुरक्षा रक्षकावर हिंसक हल्ला चढवला. या घटनेनंतर रुग्णालयातील कर्मचारी कमालीचे संतप्त झाले असून त्यांनी कामावर बहिष्कार टाकत अधिष्ठातांच्या (डीन) कार्यालयाला घेराव घातला.
नेमका प्रकार काय?
मिळालेल्या माहितीनुसार, रुग्णालयातील एका वॉर्डमध्ये दाखल असलेल्या रुग्णाची प्रकृती खालावल्याने त्याचा मृत्यू झाला. या घटनेचा राग नातेवाईकांनी तिथे उपस्थित असलेल्या परिचारिकेवर काढला. नातेवाईकांनी त्यांना शिवीगाळ करत मारहाण करण्यास सुरुवात केली. यावेळी नर्सेसच्या मदतीला धावून आलेल्या सुरक्षा रक्षकालाही नातेवाईकांनी बेदम मारहाण केली. या अनपेक्षित हल्ल्यात नर्स आणि सुरक्षा रक्षक दोघेही जखमी झाले आहेत.
कर्मचाऱ्यांचा आक्रमक पवित्रा
आपल्या सहकाऱ्यांवर झालेल्या हल्ल्याची बातमी वाऱ्यासारखी पसरताच केईएममधील सर्व परिचारिका आणि कर्मचारी एकत्र जमले. कर्मचाऱ्यांनी सुरक्षा व्यवस्थेवर प्रश्नचिन्ह उपस्थित करत अधिष्ठातांना जाब विचारला. घटनेला वेळ उलटूनही अद्याप हल्लेखोरांवर गुन्हा (FIR) का दाखल झाला नाही? वारंवार होणाऱ्या हल्ल्यांपासून कर्मचाऱ्यांना सुरक्षा कधी मिळणार? जोपर्यंत आरोपींना अटक होत नाही, तोपर्यंत काम न करण्याची भूमिका काही कर्मचाऱ्यांनी घेतली आहे.
पोलीस कारवाई आणि सद्यस्थिती
केईएम रुग्णालयात सध्या तणावपूर्ण शांतता असून परिस्थिती हाताळण्यासाठी पोलीस बंदोबस्त तैनात करण्यात आला आहे. पोलीस सध्या वॉर्डमधील सीसीटीव्ही (CCTV) फुटेज तपासत असून प्रत्यक्षदर्शींचे जबाब नोंदवले जात आहेत. वैद्यकीय सेवा देणाऱ्या कर्मचाऱ्यांवरील वाढत्या हल्ल्यांमुळे पुन्हा एकदा मुंबईतील रुग्णालयांच्या सुरक्षिततेचा मुद्दा चर्चेत आला आहे.
