मुंबई : मुंबई भाजपचे माजी प्रदेशाध्यक्ष तसेच उत्तर भारतीय समाजातील प्रभावी नेते म्हणून ओळख असलेले राज के. पुरोहित यांचे रविवारी निधन झाले. ते ७१ वर्षांचे होते. मुंबईतील एका खासगी रुग्णालयात उपचारादरम्यान त्यांनी अखेरचा श्वास घेतला.
राज के. पुरोहित यांचे पार्थिव आज, रविवार १८ जानेवारी २०२६ रोजी सकाळी ११ ते दुपारी १ वाजेपर्यंत मरीन ड्राइव्ह येथील राजहंस बिल्डिंग, जी रोड येथे अंत्यदर्शनासाठी ठेवण्यात येणार आहे.
राज पुरोहित यांनी आपल्या राजकीय कारकिर्दीत राज्य मंत्रिपद भूषवले होते. स्पष्टवक्तेपणा, आक्रमक भूमिका आणि कार्यकर्त्यांशी असलेला थेट संवाद यामुळे ते विशेष ओळखले जात होते. सामान्य कार्यकर्त्यांमध्ये ते प्रेमाने ‘राजभाई’ म्हणून ओळखले जात. गिरगाव, काळबादेवी आणि मुंबादेवी परिसरातील स्थानिक प्रश्नांवर त्यांची मजबूत पकड होती, तसेच दक्षिण मुंबईतील राजकारणात त्यांचा मोठा दबदबा होता.
दरम्यान, नुकत्याच पार पडलेल्या मुंबई महानगरपालिका निवडणुकीत प्रभाग क्रमांक २२१ मधून त्यांचे पुत्र आकाश पुरोहित विजयी झाले होते. मुलाच्या या राजकीय यशानंतर अवघ्या दोन दिवसांतच राज के. पुरोहित यांचे निधन झाल्याने, पुरोहित कुटुंबावर दु:खाचा डोंगर कोसळला आहे. त्यांच्या निधनाने भाजपमध्येच नव्हे, तर मुंबईच्या राजकीय व सामाजिक क्षेत्रातही हळहळ व्यक्त केली जात आहे.
