Sanjay Raut on Sharad Pawar : बारामतीत २८ डिसेंबर रोजी अदानी ग्रुपचे अध्यक्ष गौतम अदानी यांच्या हस्ते ‘शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्स’ या केंद्राचे उद्घाटन झाले. या कार्यक्रमात शरद पवार, उपमुख्यमंत्री अजित पवार, खासदार सुप्रिया सुळे, सुनेत्रा पवार यांच्यासह पवार कुटुंबातील प्रमुख नेते एकत्र आले. अदानी ग्रुपकडून या केंद्राला मोठी आर्थिक मदत मिळाली असून पवार आणि अदानी यांचे जुने वैयक्तिक संबंध आहेत.
या कार्यक्रमाच्या पार्श्वभूमीवर शिवसेना ठाकरे गटाचे खासदार संजय राऊत यांनी जोरदार टीका करत खळबळजनक दावा केला आहे. ते म्हणाले की शरद पवार आणि गौतम अदानी यांचे संबंध राजकीय नसून कौटुंबिक आणि व्यक्तिगत आहेत. कार्यक्रमाला कुणाला बोलवायचे हा त्यांचा वैयक्तिक प्रश्न आहे. संपूर्ण पवार कुटुंब एकत्र येऊन अजित पवारही उपस्थित राहिले तर तो त्यांचा खाजगी निर्णय आहे.
मात्र संजय राऊत पुढे म्हणाले की गौतम अदानींच्या भावाचा शरद पवारांचा पक्ष फोडण्यात सहभाग होता अशी ऐकीव माहिती आहे. अजित पवारांना पक्षातून फोडण्यासाठी अदानींची भूमिका होती अशी माहिती मी वाचली आणि ऐकली आहे. खरे की खोटे हे ते स्वतः सांगतील असा सूचक इशारा त्यांनी दिला.
याशिवाय राऊतांनी अदानींवर मुंबई ताब्यात घेण्याचा प्रयत्न करत असल्याचा आरोप केला. ते म्हणाले की मोदी आणि भाजपच्या मदतीने अदानी मुंबई गिळंकृत करण्याचा प्रयत्न करत आहेत. टाटा, बिर्ला, अंबानी यांसारखे उद्योगपती मुंबईत आले पण अदानींना ज्या पद्धतीने उत्तेजन दिले जात आहे ते मुंबई आणि मराठी माणसासाठी घातक आहे.
या कार्यक्रमात रोहित पवारांनी अदानींच्या गाडीचे सारथ्य केले आणि अजित पवार त्यांच्यासोबत बसले होते. यावरही राऊत म्हणाले की रोहित पवारांनी अदानींची गाडी का चालवली हे त्यांनाच विचारा. संजय राऊतांच्या या दाव्याने राजकीय वर्तुळात खळबळ उडाली असून महायुती आणि महाविकास आघाडीतील संबंधांवर नवे प्रश्नचिन्ह निर्माण झाले आहे.
