School Holidays : राज्यातील विद्यार्थी आणि पालकांसाठी महत्त्वाची बातमी आहे. मकरसंक्रांत सण आणि महापालिका निवडणुकांच्या पार्श्वभूमीवर राज्यातील शाळांना सलग पाच दिवस सुट्टी जाहीर करण्यात आली आहे. १४ जानेवारीपासून शाळांना सुट्टी लागणार असून, शाळा थेट पुढील सोमवारी पुन्हा सुरू होणार आहेत.
१४ जानेवारी रोजी मकरसंक्रांत साजरी केली जाणार आहे. त्यानंतर १५ जानेवारीला महापालिका निवडणुकीसाठी मतदान होणार असून, १६ जानेवारीला मतमोजणी पार पडणार आहे. अनेक शाळांमध्ये मतदान केंद्र असल्याने सुरक्षेच्या आणि निवडणूक व्यवस्थेच्या दृष्टीने हा निर्णय घेण्यात आला आहे.
मतदानानंतर १७ जानेवारी रोजी शनिवार असून अनेक शाळांना नेहमीची साप्ताहिक सुट्टी असते, तर १८ जानेवारीला रविवारची सार्वजनिक सुट्टी आहे. त्यामुळे १४ ते १८ जानेवारीदरम्यान विद्यार्थ्यांना सलग पाच दिवसांची सुट्टी मिळणार आहे.
दरम्यान, अनेक शिक्षक आणि शासकीय कर्मचाऱ्यांची निवडणूक ड्युटी लागल्याने शाळांचे कामकाज बंद ठेवण्याचा निर्णय प्रशासनाने घेतला आहे. ज्या शाळा, कार्यालये, संस्था आणि सभागृहांमध्ये मतदान केंद्र आहेत, त्या ठिकाणी मतदानाच्या आदल्या दिवशी तसेच मतदानाच्या दिवशी पूर्णपणे सुट्टी राहणार आहे.
निवडणूक साहित्याचे वाटप, मतदान यंत्रांची वाहतूक, मतदान कक्षांची मांडणी आणि कायदा-सुव्यवस्थेच्या तयारीसाठी ही सुट्टी आवश्यक असल्याचे प्रशासनाकडून स्पष्ट करण्यात आले आहे.
