मुंबई : राज्यात सनदी अधिकाऱ्यांच्या बदल्यांचा सिलसिला कायम आहे. नुकतेच राज्य सरकारने पाच भारतीय प्रशासकीय सेवा (IAS) अधिकाऱ्यांच्या बदल्यांचे आदेश जारी केले आहेत. यामध्ये अकोला, वाशिम आणि परभणीच्या जिल्हाधिकारीपदांवर नव्या नियुक्त्या करण्यात आल्या असून, महाराष्ट्र राज्य बियाणे महामंडळ (महाबीज) आणि मुंबईतील मुद्रांक शुल्क नियंत्रक पदांवरही नवे अधिकारी नियुक्त झाले आहेत. या बदल्यांमुळे प्रशासकीय यंत्रणा अधिक सक्षम होण्याची अपेक्षा आहे.
बदली झालेल्या IAS अधिकाऱ्यांची यादी
1. योगेश कुंभेजकर : वाशिमचे नवे जिल्हाधिकारी. यापूर्वी ते महाबीज, अकोलाचे व्यवस्थापकीय संचालक होते.
2. वर्षा मीना : अकोलाच्या नव्या जिल्हाधिकारी. त्यांनी यापूर्वी विविध प्रशासकीय पदांवर महत्त्वपूर्ण कामगिरी केली आहे.
3. संजय चव्हाण : परभणीचे नवे जिल्हाधिकारी. यापूर्वी ते कोल्हापूर जिल्हा परिषदेचे मुख्य कार्यकारी अधिकारी होते.
4. भुवनेश्वरी एस. : महाराष्ट्र राज्य बियाणे महामंडळ (महाबीज), अकोलाच्या व्यवस्थापकीय संचालक. त्या धुळे जिल्हा परिषदेच्या मुख्य कार्यकारी अधिकारी होत्या.
5. रघुनाथ गावडे : मुंबई येथील अतिरिक्त मुद्रांक शुल्क नियंत्रक. यापूर्वी ते परभणीचे जिल्हाधिकारी होते.
कोण आहेत भुवनेश्वरी एस.?
2015 बॅचच्या IAS अधिकारी भुवनेश्वरी एस. या तामिळनाडूच्या मद्रास येथील रहिवासी आहेत. संगणक विज्ञानात पदव्युत्तर पदवी घेतलेल्या भुवनेश्वरी यांनी कोल्हापूर येथे सहायक जिल्हाधिकारी, यवतमाळच्या पांढरकवडा येथे उपविभागीय अधिकारी, नाशिक आणि भंडारा जिल्हा परिषदेच्या मुख्य कार्यकारी अधिकारी, नागपूर स्मार्ट सिटीच्या मुख्य कार्यकारी अधिकारी आणि वनामतीच्या महासंचालक अशा विविध पदांवर काम केले आहे. धुळे जिल्हा परिषदेच्या मुख्य कार्यकारी अधिकारी असताना त्यांनी आरोग्य आणि शिक्षण क्षेत्रात विशेष योगदान दिले. आता महाबीजच्या व्यवस्थापकीय संचालक म्हणून त्या अकोल्यात रुजू होणार असून, शेती आणि बियाणे वितरणाशी संबंधित योजनांना गती देण्याचे त्यांचे नियोजन आहे.
राज्यात गेल्या काही महिन्यांपासून प्रशासकीय पुनर्रचना जोरात सुरू आहे. यापूर्वी तुकाराम मुंढे यांची दिव्यांग कल्याण विभागाच्या सचिवपदी, तर सुशील खोडवेकर यांची असंघटित कामगार विकास आयुक्तपदी नियुक्ती झाली होती. तसेच, डॉ. अशोक करंजकर यांची उर्वरित महाराष्ट्र वैधानिक विकास मंडळाच्या सदस्य सचिवपदी आणि संजय कोलते यांची शिवशाही पुनर्वसन प्रकल्पाच्या व्यवस्थापकीय संचालकपदी नियुक्ती झाली होती.
