Ahilyanagar News : अहिल्यानगर जिल्ह्यातील संगमनेर तालुक्यात एक अत्यंत संतापजनक आणि धक्कादायक घटना समोर आली आहे. वडगावपान येथे सहावीत शिकणाऱ्या अल्पवयीन मुलीवर अज्ञात व्यक्तीने अॅसिड फेकल्याची घटना मंगळवारी घडली. शाळेतून घरी परतत असताना हा भयंकर हल्ला करण्यात आला असून आरोपी घटनास्थळावरून फरार झाला आहे.
या हल्ल्यात मुलीच्या चेहऱ्याच्या उजव्या बाजूला गंभीर इजा झाली असून तिच्यावर लोणी प्रवरा ग्रामीण रुग्णालयात उपचार सुरू आहेत. आज तिच्यावर प्लास्टिक सर्जरी करण्यात येणार असल्याची माहिती समोर आली आहे. दरम्यान, या घटनेच्या निषेधार्थ वडगावपान गावातील नागरिकांनी रास्तारोको आंदोलनाची हाक दिली आहे.
घटनेनंतर पोलिसांनी तपासाची चक्रे वेगाने फिरवली असून आरोपीच्या शोधासाठी १० विशेष पथकं तैनात करण्यात आली आहेत. या प्रकरणावर भाजप नेत्या चित्रा वाघ यांनी तीव्र संताप व्यक्त केला आहे. त्यांनी पीडित मुलीच्या कुटुंबीयांशी संवाद साधून शासनाकडून सर्वोत्तम वैद्यकीय मदत दिली जाईल, असा विश्वास दिला. तसेच कुटुंबाला सर्वतोपरी मदतीचा शब्दही त्यांनी दिला आहे.
राज्य सरकार या प्रकरणाकडे गांभीर्याने पाहत असून देवेंद्र फडणवीस आणि पालकमंत्री विखे पाटील स्वतः लक्ष ठेवून आहेत. आरोपीला लवकरच अटक करून त्याच्यावर कठोरात कठोर कारवाई केली जाईल, अशी ठाम भूमिका शासनाने घेतली आहे. महिलां आणि बालकांच्या सुरक्षेबाबत ‘झिरो टॉलरन्स’ धोरण कायम असल्याचेही स्पष्ट करण्यात आले आहे.
