नंदुरबार : स्थानिक स्वराज्य संस्थांच्या निवडणुकीच्या पार्श्वभूमीवर महाराष्ट्रातील राजकीय वातावरण तापलं आहे. सर्वच पक्षांनी निवडणूक तयारीला जोरदार सुरुवात केली असताना, पक्षांतर आणि नेत्यांचे इनकमिंग-आउटगोईंग यांचे सत्र सुरू आहे. या घडामोडींमध्ये उपमुख्यमंत्री एकनाथ शिंदे यांच्या शिवसेना गटाला नंदुरबारमध्ये मोठा धक्का बसला आहे. शिंदे गटाचे प्रमुख नेते आणि आमदार चंद्रकांत रघुवंशी यांचे निकटवर्तीय संतोष पाटील यांनी भाजपमध्ये प्रवेश केला आहे.
नंदुरबारमधील तिलाली गावचे सरपंच, धुळे-नंदुरबार जिल्हा मध्यवर्ती बँकेचे संचालक आणि विकास सोसायटीचे अध्यक्ष असलेले संतोष पाटील यांनी भाजपचे आमदार विजयकुमार गावित आणि माजी खासदार हिना गावित यांच्या उपस्थितीत भाजपमध्ये प्रवेश केला. गेल्या ६० वर्षांपासून संतोष पाटील हे रघुवंशी कुटुंबाशी जोडलेले होते आणि नंदुरबार तालुक्याच्या पूर्व भागात त्यांचा मोठा प्रभाव आहे. त्यांच्या या पक्षांतराने शिंदे गट आणि आमदार चंद्रकांत रघुवंशी यांच्यासाठी मोठा राजकीय धक्का मानला जात आहे.
संतोष पाटील यांनी पक्ष सोडण्यामागील कारण देताना आमदार चंद्रकांत रघुवंशी यांच्यावर गंभीर आरोप केले. “रघुवंशी त्यांच्या निकटवर्तीयांना डावलत आहेत आणि त्यांचं खच्चीकरण करत आहेत. कोणत्याही कार्यक्रमात ते आम्हाला बोलावत नाहीत किंवा विश्वासात घेत नाहीत,” असं पाटील यांनी म्हटलं. या नाराजीमुळे त्यांनी शिंदे गटाला सोडचिठ्ठी देत भाजपमध्ये जाण्याचा निर्णय घेतला.
संतोष पाटील यांचा नंदुरबार तालुक्यातील पूर्व भागात असलेला प्रभाव आणि त्यांचं स्थानिक पातळीवरील नेतृत्व पाहता, त्यांच्या पक्षांतराने शिंदे गटाची स्थानिक पकड कमकुवत होण्याची शक्यता आहे. भाजपने पाटील यांना पक्षात सामावून घेऊन नंदुरबारमधील आपलं वर्चस्व वाढवण्याचा प्रयत्न केला आहे. यामुळे आगामी स्थानिक स्वराज्य संस्थांच्या निवडणुकीत शिंदे गटाला मोठं आव्हान निर्माण होऊ शकतं.
