Beed Crime: सरपंच संतोष देशमुख हत्या प्रकरणाला एक वर्ष पूर्ण झाले असून, या प्रकरणातील आरोपी वाल्मिक कराडसह इतर आरोपी बीड जिल्हा कारागृहात कैद आहेत. परंतु, आरोपी प्रतीक घुलेने कारागृहातील कर्मचाऱ्याला थेट धमकी दिल्याचे गंभीर आरोप समोर आले आहेत. त्याने ‘बाहेर आल्यावर तुला बघतो’ अशी धमकी दिल्यामुळे कारागृहात खळबळ उडाली आहे.
वाल्मिक कराडबाबत गंभीर आरोप
दरम्यान, शिवसेना शिंदे गटाचे जिल्हाप्रमुख स्वप्निल गलधर यांनी प्रतीक घुलेने धमकी दिल्याचा आरोप केला आहे. त्यांनी म्हटलं आहे की, प्रतीक घुलेला प्रकरणाबाबत कोणताही पश्चाताप नाही, तर त्याने धमकी देत पराक्रम दाखवण्याचा प्रयत्न केला आहे. कारागृह अधिक्षकांनी त्याच्यावर तातडीने कारवाई करावी, अन्यथा साडी चोळी भेट देऊ असा इशाराही गलधर यांनी दिला आहे. मकोकातील काही आरोपी दुसऱ्या कारागृहात हलवण्याचे आदेश असूनही त्यांना येथे का ठेवले जात आहे? असा सवाल त्यांनी उपस्थित केला. स्वप्निल गलधर यांनी वाल्मिक कराड कारागृहात मोबाईल वापरत असून रिचार्ज करत असल्याचा आरोप देखील केला.
बीड जिल्हा कारागृहाचे अधीक्षक राजाराम सिद्धलिंग चांदणे यांनी फोनवर प्रतिक्रिया देताना सांगितले की, कारागृहातील कर्मचारी गवते असून त्यांनी अशी कोणतीही तक्रार नोंदवलेली नाही. धमकीचा प्रकार घडला नसल्याचे आमचे निरीक्षण आहे. कारागृहात सीसीटीव्ही असल्यामुळे कोणतीही घटना लपून राहणार नाही. तथापी, या प्रकरणी कायदेशीर कारवाई केली जाईल, असंही त्यांनी म्हटलं आहे.
