पुणे : पुणे महानगरपालिका निवडणुकीच्या पार्श्वभूमीवर दोन्ही राष्ट्रवादी काँग्रेस पक्षांचा संयुक्त जाहीरनामा जाहीर करण्यात आला असून, उपमुख्यमंत्री अजित पवार यांनी पुणेकरांसाठी मोठी आणि धक्कादायक घोषणा केली आहे. पुण्यातील नागरिकांना मेट्रो आणि PMPML बसचा प्रवास पूर्णतः मोफत देण्याचे आश्वासन अजित पवार यांनी दिले आहे.
अजित पवार म्हणाले की, पुण्यातील वाहतूक कोंडी आणि खराब रस्त्यांमुळे दररोज सुमारे साडे सात कोटी रुपये पेट्रोलवर खर्च होतात. वर्षाला हा खर्च तब्बल 10,800 कोटी रुपयांपर्यंत जातो. हा पैसा सार्वजनिक वाहतुकीवर खर्च केला तर मेट्रो आणि बस प्रवास मोफत करता येऊ शकतो. मोठ्या प्रमाणावर नागरिकांनी सार्वजनिक वाहतूक वापरल्यास खासगी वाहनांची संख्या कमी होईल, वाहतूक कोंडी सुटेल आणि पुणे प्रदूषणमुक्त होईल, असा विश्वास त्यांनी व्यक्त केला.
“महापालिकेची सत्ता आमच्या हातात दिली तर मोफत मेट्रो योजना प्रत्यक्षात आणून दाखवू,” असे ठाम आश्वासन अजित पवार यांनी दिले. पुणे आमचं शहर आहे, पुणेकरांबद्दल आमचं विशेष आपुलकीचं नातं आहे, त्यामुळे पुणेकरांनी आम्हालाच संधी द्यावी, असं आवाहनही त्यांनी केलं.
संयुक्त जाहीरनाम्यात पाणीपुरवठा, रस्ते, वाहतूक, आरोग्य, शिक्षण, मालमत्ता कर सवलत, झोपडपट्टी पुनर्वसन आणि पर्यावरणपूरक विकास यासारख्या अनेक महत्त्वाच्या मुद्द्यांवर भर देण्यात आला असून, मोफत मेट्रो आणि बस प्रवास ही या जाहीरनाम्यातील सर्वात मोठी ‘गेमचेंजर’ घोषणा मानली जात आहे.
