Prashant Jagtap Resignation: राज्यातील महानगरपालिकांच्या निवडणुकांचे रणशिंग फुंकले गेले असतानाच, पुणे राजकीय वर्तुळातून एक मोठी बातमी समोर आली आहे. राष्ट्रवादी काँग्रेस (शरदचंद्र पवार) पक्षाचे पुणे शहराध्यक्ष आणि शरद पवारांचे कट्टर समर्थक मानले जाणारे प्रशांत जगताप यांनी आपल्या पदाचा आणि पक्षाच्या प्राथमिक सदस्यत्वाचा तडकाफडकी राजीनामा दिला आहे. दोन्ही राष्ट्रवादी पक्ष (अजित पवार गट आणि शरद पवार गट) पुणे महापालिका निवडणुकीसाठी एकत्र येण्याच्या हालचालींमुळे जगताप कमालीचे नाराज होते.
युतीच्या चर्चेतून बंडाचे निशाण
पुणे आणि पिंपरी-चिंचवड महानगरपालिका काबीज करण्यासाठी शरद पवार आणि अजित पवार यांचे दोन्ही गट पुन्हा एकत्र येण्याची दाट शक्यता वर्तवली जात आहे. केवळ औपचारिक घोषणा बाकी असतानाच, प्रशांत जगताप यांनी ‘एकला चलो रे’ची भूमिका घेत पक्षाला रामराम ठोकला आहे. त्यांनी आपला राजीनामा प्रदेशाध्यक्ष शशिकांत शिंदे यांच्याकडे ई-मेलद्वारे सुपूर्द केला आहे.
२७ वर्षांचा प्रवास, पण विचारांशी तडजोड नाही
पत्रकार परिषदेत आपल्या भावना व्यक्त करताना जगताप म्हणाले, 27 वर्षांपूर्वी मी जेव्हा राजकारणात पाऊल ठेवले, तेव्हा पदासाठी नव्हे तर पुरोगामी विचारांच्या चळवळीसाठी आलो होतो. आजही माझे तेच ध्येय आहे. दोन्ही गट एकत्र येण्याच्या हालचाली माझ्या तत्त्वांना पटणाऱ्या नाहीत. २७ वर्षांच्या या प्रवासात साथ देणाऱ्या कार्यकर्त्यांचे आणि संधी दिल्याबद्दल शरद पवार यांचे त्यांनी आभार मानले.
निवडणूक लढवणारच; अपक्ष की नवा मार्ग?
प्रशांत जगताप यांनी राजकारणातून निवृत्ती घेणार नसल्याचे स्पष्ट केले आहे. मी पुणे महानगरपालिकेची निवडणूक शंभर टक्के लढवणार आहे, असे सांगत त्यांनी निवडणुकीच्या रिंगणात उतरण्याचे संकेत दिले आहेत. मात्र, ते अपक्ष लढणार की एखाद्या दुसऱ्या पक्षात प्रवेश करणार, याबाबत त्यांनी अद्याप सस्पेन्स कायम ठेवला आहे.
राष्ट्रवादी काँग्रेस पार्टी शरदचंद्र पवार पक्षाच्या प्राथमिक व क्रियाशील सदस्यत्वाचा आज मी राजीनामा देत आहे. आजपर्यंत दिलेल्या संधीसाठी नेतृत्वाचे मनापासून आभार !
२७ वर्षांपूर्वी मी सामाजिक व राजकीय क्षेत्रात पाऊल ठेवले, तेव्हा कुठल्या पदासाठी नव्हे, तर पुरोगामी विचारांची चळवळ…
— Prashant Sudamrao Jagtap (@JagtapSpeaks) December 24, 2025
पुणे राष्ट्रवादीसाठी चिंतेची बाब
प्रशांत जगताप हे पुण्याच्या राजकारणातील अभ्यासू आणि आक्रमक चेहरा मानले जातात. आगामी निवडणुकीच्या तोंडावर त्यांचा राजीनामा हा शरद पवार यांच्या पक्षासाठी मोठा फटका मानला जात आहे. विशेषतः पुणे शहरात पक्षाची बांधणी करण्यात जगतापांचा मोठा वाटा होता, आता राजानाम्यामुळे पक्षांतर्गत गणिते बिघडण्याची शक्यता आहे.
