Pune Election 2026 : पुणे महानगरपालिका निवडणुकीच्या पार्श्वभूमीवर महायुतीत जागावाटपावरून मोठी खदखद निर्माण झाली आहे. शिंदे गटाच्या शिवसेनेचे पुणे शहरप्रमुख आणि माजी आमदार रवींद्र धंगेकर यांनी भाजपवर थेट आरोप करत कार्यकर्त्यांच्या भावना व्यक्त केल्या आहेत.
धंगेकर यांनी सांगितले की, भाजपने शिवसेनेला दिलेला जागावाटपाचा प्रस्ताव मान्य नाही. ज्या जागा भाजप ऑफर करत आहे, त्या जागांवर कधीही भाजप किंवा शिवसेना निवडून आलेली नाही. अशा जागा घेऊन आम्ही काय करणार, असा सवाल त्यांनी उपस्थित केला. कार्यकर्त्यांना न्याय मिळाला नाही तर निवडणुका कोणासाठी लढवायच्या, असा रोखठोक प्रश्न त्यांनी विचारला आहे.
शिवसेना कार्यकर्त्यांमध्ये भाजपकडून दुर्लक्ष होत असल्याची नाराजी आहे. काही कार्यकर्ते मुंबईत उपमुख्यमंत्री एकनाथ शिंदे यांची भेट घेऊन स्वबळावर निवडणूक लढण्याची मागणी करत आहेत. धंगेकर यांनी म्हटले आहे की, अशा प्रकारची युती घातक ठरेल आणि कार्यकर्त्यांच्या तीव्र भावना नेत्यांना तोंड द्याव्या लागतील.
याशिवाय राष्ट्रवादी काँग्रेसच्या अजित पवार गटाने शिवसेनेला बोलण्याची तयारी दर्शवली असल्याची माहिती धंगेकर यांनी दिली. कार्यकर्त्यांच्या भावना ओळखून पक्ष नेतृत्व निर्णय घेईल, असे ते म्हणाले.
धंगेकर यांचा मुलगा प्रणव धंगेकर प्रभाग क्रमांक २४ मधून निवडणूक लढवण्याच्या तयारीत असल्याचे सांगितले जात आहे. मात्र तो पक्षाच्या चिन्हावर की अपक्ष लढणार याबाबत स्पष्टता नाही.
भाजप पुण्यात मजबूत स्थितीत असून १२५ पेक्षा जास्त जागांचा दावा करत आहे. शिंदे सेना मात्र ३५ ते ४० जागांची मागणी करतेय. महायुतीची युती टिकेल की तुटेल याकडे सर्वांचे लक्ष लागले आहे. दुसरीकडे ठाकरे सेना आणि मनसे यांची युती निश्चित झाली आहे.
निवडणुकीची नामनिर्देशन प्रक्रिया सुरू असून राजकीय घडामोडींना आणखी वेग येणार आहे. शिंदे सेनेसमोरील कार्यकर्त्यांच्या नाराजीचे आव्हान मोठे मानले जात आहे.
