PMC Election 2026: महानगरपालिका निवडणुकीच्या ऐन धामधुमीत राज्याचे उपमुख्यमंत्री अजित पवार यांच्या राष्ट्रवादी काँग्रेसला मोठा राजकीय हादरा बसला आहे. पुण्यात गुन्हेगारी पार्श्वभूमी असलेल्या उमेदवारांना दिलेल्या तिकिटावरून निर्माण झालेला वाद आता वेगळ्या वळणावर पोहोचला असून, रिपब्लिकन पार्टी ऑफ इंडिया (खरात गट) चे अध्यक्ष सचिन खरात यांनी निवडणुकीतून पूर्णपणे माघार घेण्याची घोषणा केली आहे.
सन्मान मिळाला नाही, विचारांशी तडजोड नको
अजित पवार यांच्यासोबत युती करण्यासाठी आपण पुढाकार घेतला होता, असे सांगत सचिन खरात यांनी आपल्या निर्णयाचे स्पष्टीकरण दिले. “आम्ही सन्मानपूर्वक जागांच्या अपेक्षेने राष्ट्रवादीसोबत गेलो होतो, मात्र तशी वागणूक मिळाली नाही. डॉ. बाबासाहेब आंबेडकरांच्या विचारांशी प्रतारणा करून मी कोणतेही चुकीचे पाऊल उचलणार नाही. राजकारणात दोन पावले मागे गेलो तरी चालेल, पण तत्त्व सोडणार नाही,” अशा कडक शब्दांत खरात यांनी आपली भूमिका मांडली. त्यांनी आता कोणत्याही उमेदवाराला आपला पाठिंबा नसल्याचेही स्पष्ट केले आहे.
हेही वाचा – पुण्यात उद्धव ठाकरेंना जबरदस्त झटका! बंडखोरांसह अधिकृत उमेदवारही भाजपात; राजकीय घडामोडींना वेग
गुन्हेगारी पार्श्वभूमीच्या उमेदवारीवरून ‘खापर’ फोडण्याचे राजकारण
पुणे महानगरपालिकेत राष्ट्रवादी काँग्रेसने काही कुख्यात टोळ्यांशी संबंधित सदस्यांना ‘एबी’ फॉर्म देऊन उमेदवारी जाहीर केली होती. यावरून विरोधकांनी टीका झोडताच अजित पवारांनी ही जबाबदारी सचिन खरात यांच्यावर ढकलली होती. आम्ही कोणत्याही गुन्हेगाराला तिकीट दिले नाही, ते उमेदवार खरात गटाचे असून युतीमुळे त्यांना तो अधिकार होता, असे सांगत अजित पवारांनी हात झटकण्याचा प्रयत्न केला होता. मात्र, आता सचिन खरात यांनीच अंग काढून घेतल्यामुळे राष्ट्रवादी काँग्रेस आणि अजित पवार यांची मोठी कोंडी झाली आहे.
पुणे महापालिका निवडणुकीत नवे वळण
सचिन खरात यांनी प्रक्रियेतून बाहेर पडल्यामुळे पुण्याच्या राजकारणात नवी समीकरणे निर्माण होण्याची शक्यता आहे. गुन्हेगारीच्या मुद्द्यावरून आधीच अडचणीत असलेल्या राष्ट्रवादीला आता मित्रपक्षाने सोडलेली साथ महागात पडू शकते. या घडामोडींमुळे पुणे महानगरपालिकेची ही निवडणूक अधिकच रंगतदार आणि संघर्षाची होणार असल्याचे चिन्हे दिसत आहेत.
