HSRP Number Plate: गुन्हेगारीला लगाम घालण्यासाठी आणि वाहनांच्या सुरक्षेसाठी अनिवार्य करण्यात आलेल्या उच्च सुरक्षा नंबरप्लेट (HSRP) बसविण्याबाबत पुणेकरांनी अद्यापही निरुत्साह दाखवला आहे. ३१ डिसेंबर ही अखेरची तारीख तोंडावर आली असताना, पुण्यातील तब्बल १६ लाख वाहनांना अजूनही जुन्याच नंबरप्लेट आहेत. वारंवार मुदतवाढ देऊनही वाहनधारकांनी याकडे दुर्लक्ष केल्याने आता परिवहन विभाग पुन्हा मुदतवाढ देणार की दंडात्मक कारवाई करणार, याकडे सर्वांचे लक्ष लागले आहे.
काय आहे सध्याची आकडेवारी?
पुणे शहरात साधारणपणे २६ लाखांहून अधिक वाहनांना ही सुरक्षा नंबरप्लेट बसवणे आवश्यक आहे. मात्र, ताज्या आकडेवारीनुसार आतापर्यंत केवळ १० लाख वाहनधारकांनी नोंदणी केली आहे. तथापी, फक्त ८ लाख वाहनांवर ही नंबरप्लेट बसवून पूर्ण झाली आहे. तथापी, डिसेंबर या शेवटच्या महिन्यात आतापर्यंत फक्त ५० हजार जणांनीच नोंदणीसाठी पुढाकार घेतला आहे. तसेच १६ लाख म्हणजेचं अद्याप ६५ टक्के वाहनांचे काम बाकी आहे.
हेही वाचा – Pune Metro: पुणेकरांसाठी खुशखबर! हिंजवडी-शिवाजीनगर मेट्रो ‘या’ तारखेपर्यंत होणार सुरू
सुरक्षा नंबरप्लेट का महत्त्वाची?
उच्च न्यायालयाच्या आदेशानुसार, 1 एप्रिल 2019 पूर्वीच्या सर्व वाहनांना ही प्लेट बसवणे बंधनकारक आहे. चोरीच्या वाहनांचा वापर करून होणारे गुन्हे रोखण्यासाठी आणि अपघातग्रस्त वाहन शोधण्यासाठी या नंबरप्लेटची मोठी मदत होते. या नंबरप्लेटमध्ये लेझर कोड आणि विशेष सुरक्षा फिचर्स असल्याने त्यासह छेडछाड करणे कठीण असते.
मुदतवाढीनंतरही नागरिकांचे दुर्लक्ष
परिवहन विभागाने आत्तापर्यंत ५ वेळा या प्रक्रियेला मुदतवाढ दिली आहे. सुरुवातीला ‘फिटमेंट सेंटर’ (नंबरप्लेट बसवण्याची केंद्रे) कमी असल्याची तक्रार नागरिकांकडून केली जात होती. आरटीओने ही संख्या वाढवूनही नागरिक मात्र केंद्रांकडे फिरकताना दिसत नाहीत. सध्याचा नोंदणीचा वेग पाहता, उरलेली १६ लाख वाहने कव्हर करण्यासाठी आणखी काही महिने लागण्याची चिन्हे आहेत. ३१ डिसेंबरनंतर आरटीओ थेट कारवाई सुरू करणार की पुन्हा एकदा ‘तारीख पे तारीख’ देणार, याबाबत संभ्रम आहे. मात्र, कारवाई सुरू झाल्यास पुणेकरांना मोठा भुर्दंड सहन करावा लागू शकतो.
