Ajit Pawar Plane Crash : राज्याचे उपमुख्यमंत्री अजित पवार यांच्या बुधवारी (२८ जानेवारी) झालेल्या विमान अपघातात दुर्दैवी निधनानंतर आता या घटनेच्या तपासाबाबत मोठा निर्णय घेण्यात आला आहे. राज्य सरकारने अजित पवारांच्या विमान अपघाताची CID चौकशी करण्याचे आदेश दिले आहेत. तसेच बारामती पोलिसांना अपघातस्थळावर कोणालाही प्रवेश न देण्याच्या सूचना देण्यात आल्या आहेत.
या प्रकरणाचा तपास एक्सिडेंटल डेथ रिपोर्ट (ADR) च्या अनुषंगाने केला जाणार असून, फॉरेन्सिक पथकाने आधीच घटनास्थळावरून आवश्यक नमुने तपासासाठी गोळा केले आहेत. प्राथमिक अहवालानुसार, विमान २८ जानेवारी रोजी सकाळी ८.१८ वाजता बारामती एटीसीच्या संपर्कात आले होते. दृश्यमानता सुमारे ३००० मीटर असल्याची माहिती देण्यात आली होती, मात्र पायलटला रनवे स्पष्ट दिसत नसल्याचे त्यांनी कळवले.
बारामती विमानतळावर ILS सुविधा नसल्याने मॅन्युअल लँडिंगचा प्रयत्न करण्यात आला. दाट धुके, टेबल-टॉप रनवे आणि दुसऱ्या लँडिंग प्रयत्नादरम्यान विमानाचा तोल गेल्याने ते रनवेच्या बाजूला कोसळले. आदळताच मोठा स्फोट होऊन भीषण आग लागली आणि बचावकार्य अडचणीत आले. अपघाताचे अंतिम कारण DGCA अहवालानंतर स्पष्ट होणार आहे.
