पुणे: संत तुकाराम महाराजांचे वंशज आणि प्रसिद्ध व्याख्याते शिरीष महाराज यांनी राहत्या घरी आत्महत्या केली आहे. शिरीष महाराज हे शिवशंभो प्रतिष्ठानचे अध्यक्ष म्हणून काम पाहत होते. वयाच्या अवघ्या ३० व्या वर्षी शिरीष महाराजांनी घरात गळफास घेत आयुष्य आपलं संपवलं आहे. या घटनेमुळे देहू परिसरात एकच शोककळा पसरली असून आत्महत्येचे कारण अद्याप समोर आलेले नाही. शिरीष महाराज मोरे यांचे काही दिवसांपूर्वीच लग्न ठरले होते. संत तुकाराम महाराजांचे ते ११ वे वंशज होते. शिरीष महाराजांनी घेतलेल्या निर्णयामुळे देहूत खळबळ माजली आहे. शिवव्याख्याते म्हणून मोरे यांचा मोठा नावलौकीक होता.
शिरीष महाराज नेहमीप्रमाणे रात्री जेवल्यानंतर झोपायला गेले होते. मात्र, सकाळी त्यांच्या खोलीचे दरवाजे उघडले नाहीत. त्यामुळे घरातील सदस्यांनी खोलीचा दरवाजा तोडल्यानंतर उपरण्याच्या सहाय्याने त्यांनी गळफास घेतल्याचे समोर आले. आर्थिक परिस्थितीला कंटाळून त्यांनी आत्महत्या केल्याची माहिती मिळत आहे. शिरीष महाराज यांचा २० दिवसांपूर्वीच साखरपुडा झाला होता. येणाऱ्या एप्रिल महिन्यात त्यांचे लग्न होते. मात्र, त्याआधीच त्यांनी आपल्या जीवनाचा शेवट केला आहे.
