Pune Railway: पुणेकरांच्या रेल्वे प्रवासातील अडथळे दूर करण्यासाठी रेल्वे प्रशासनाने आता कंबर कसली असून, स्थानकाच्या विस्तारीकरणाचा एक महत्त्वाचा ‘मास्टर प्लॅन’ तयार केला आहे. या योजनेनुसार, पुणे स्थानकावर ६ नवीन प्लॅटफॉर्म उभारले जाणार असून, गाड्यांची संख्याही मोठ्या प्रमाणात वाढवण्यात येणार आहे. यामुळे भविष्यात पुणे स्थानकाची प्रवासी हाताळण्याची क्षमता थेट दुप्पट होणार आहे.
पुणे स्थानकाचा असा असेल नवा चेहरा
सध्या असलेल्या फलाटांची लांबी वाढवण्यासोबतच ६ नवीन फलाट (प्लॅटफॉर्म) बांधले जातील. सध्या पुण्यावरून ५० गाड्या सुटतात. पुढील पाच वर्षांत ही संख्या ११० पर्यंत नेण्याचे उद्दिष्ट आहे. म्हणजेच तब्बल ६० नवीन गाड्या पुणेकरांच्या सेवेत दाखल होतील. सध्या धावणाऱ्या ७५ गाड्यांना १९८ जादा डबे जोडले जातील, ज्यामुळे दररोज २० हजार अतिरिक्त प्रवाशांना जागा उपलब्ध होईल. या सर्व बदलांमुळे सुमारे दीड लाख प्रवाशांचा प्रवास अधिक सुकर होईल आणि वेटिंग लिस्टची समस्या कमी होण्यास मदत होईल.
सॅटेलाइट टर्मिनल्सवर भर
पुणे स्थानक परिसरात जागेची कमतरता लक्षात घेता, प्रशासनाने शहराच्या बाजूला दोन सॅटेलाइट स्थानके विकसित करण्याचा निर्णय घेतला आहे. याशिवाय आळंदी, उरुळी आणि फुरसुंगी येथे ‘मेगा कोचिंग टर्मिनल’ उभारले जातील. यामुळे मुख्य पुणे स्थानकावरील गाड्यांचा ताण कमी होईल आणि उपनगरातील प्रवाशांना तिथूनच गाडी पकडणे सोपे जाईल. रेल्वेमंत्री अश्विनी वैष्णव यांनी देशातील ज्या ४८ प्रमुख स्थानकांचा चेहरामोहरा बदलण्याचे निश्चित केले आहे, त्यामध्ये महाराष्ट्रातील पुणे, मुंबई आणि नागपूरचा समावेश आहे. पुढील पाच वर्षांत पूर्ण होणाऱ्या या प्रकल्पामुळे पुणे केवळ शैक्षणिक किंवा आयटी हब न राहता, रेल्वे कनेक्टिव्हिटीच्या बाबतीतही देशातील एक प्रमुख केंद्र ठरेल.
