Pune Crime: पुण्यात अंधश्रद्धेच्या नावाखाली कोट्यवधी रुपयांची फसवणूक केल्याचा धक्कादायक प्रकार समोर आला आहे. एका भोंदू बाबाने आणि त्याच्या साथीदारिणीने शहरातील आयटी इंजिनियर दिपक डोळस आणि त्यांच्या शिक्षक पत्नीची तब्बल १४ कोटी रुपयांची फसवणूक केली आहे. या घटनेने आयटी क्षेत्र आणि पुण्यातील उच्चवर्गीय समाज हादरला आहे. पोलिसांच्या माहितीनुसार, दिपक खडके नावाचा भोंदू बाबा आणि त्याची शिष्या वेदिका पंढरपुरकर यांनी “शंकर महाराज माझ्या अंगात येतात आणि ते आजार बरे करतात” असा दावा करत डोळस दाम्पत्याला जाळ्यात ओढले. त्यांच्या दोन मुलींच्या आजारावर उपाय म्हणून खडके आणि वेदिकाने ‘दैवी आदेश’ सांगून डोळस कुटुंबाकडून एकामागोमाग एक मालमत्ता विकायला लावल्या.
इंग्लंडमधील घरासह सर्व मालमत्ता विकायला लावली
दिपक डोळस काही वर्ष इंग्लंडमध्ये नोकरी करत होते. तिथले घर, फार्महाऊस आणि पुण्यातील फ्लॅटसुद्धा तुमच्यावर दोष आहेत या कारणावरून विकायला भाग पाडण्यात आले. या सर्व विक्रीतून आलेला पैसा आरटीजीएसद्वारे राजेंद्र खडके आणि वेदिका पंढरपुरकर यांच्या खात्यांमध्ये वळवण्यात आला.
एकमेव घरही तारण ठेवायला लावलं
जेव्हा मुलींची प्रकृती सुधारली नाही, तेव्हा डोळस दाम्पत्याने दोघांकडे विचारणा केली असता त्यांनी ‘तुमच्या घरात दोष आहे’ असे सांगून शेवटचे राहिलेले घरही तारण ठेवून लोन काढण्यास भाग पाडले. पर्सनल लोन घेऊन दिलेला पैसा सुद्धा आरोपींनी अपहार केला आणि त्या पैशातून कोथरुड येथील महात्मा सोसायटीमध्ये आलीशान बंगला खरेदी केल्याचा आरोप आहे.
२०१८ पासून सुरू होता संपूर्ण प्रकार
ही फसवणूक २०१८ पासून सुरू होती, असे पोलीस तपासात समोर आले आहे. दिपक डोळस, त्यांच्या पत्नी आणि दोन मुली या सर्वांना अनेक वेळा खडके-पंढरपुरकर यांच्या दरबारात बोलावून दैवी आदेश सांगितले जात होते. प्रत्येक वेळी नवे कारण सांगून डोळस कुटुंबाकडून मोठी रक्कम वसूल केली गेली. या प्रकरणावर पोलिसांकडून गंभीर गुन्हा दाखल करण्याची प्रक्रिया सुरू असून, फसवणुकीची रक्कम आणि मालमत्तेचा मागोवा घेतला जात आहे.
