पुणे: जिल्हा परिषद शिक्षकांची हजेरी आता बायोमेट्रिकवर होणार आहे. या नव्या प्रणालीमुळे शिक्षकांच्या अनुपस्थितीचे प्रमाण कमी होणार आहे. शाळेच्या गुणवत्तावाढीसाठी शिक्षकांनी शाळेत जाऊन मुलांना अध्यापन करणे महत्त्वाचे आहे. तीन हजार 546 प्राथमिक शाळांमध्ये प्रत्येक एकप्रमाणे बायोमेट्रिक यंत्रणा बसविण्यात येणार आहे. शाळांमध्ये बायोमेट्रिक यंत्रे बसवण्यासाठी आवश्यक असलेला निधी जिल्हा वार्षिक योजना, कंपनीचा सामाजिक उत्तरदायित्व निधी (सीएसआर) तसेच इतर शासकीय योजनांमधून उपलब्ध करून देण्यात येणार आहे. या निर्णयामुळे शिक्षकांना शाळेत वेळेवर हजर राहावे लागणार आहे. त्यामुळे विद्यार्थ्यांचे शिक्षण अधिक प्रभावी होण्यास मदत होईल. तंत्रज्ञानाचा उपयोग करून शिक्षण क्षेत्र अधिक पारदर्शक व सुस्थितीत ठेवण्याच्या दृष्टीने हा एक सकारात्मक निर्णय ठरणार असल्याचे प्रशासनाकडून सांगण्यात आले.
दरम्यान, जिल्हा परिषदेचे (प्राथमिक) शिक्षणाधिकारी संजय नाईकडे म्हणाले की, मुख्य कार्यकारी अधिकारी गजानन पाटील यांनी सर्व शिक्षक संघटनांची बैठक घेऊन चर्चा केली. त्यामध्ये केंद्र प्रमुख किंवा शाळांनी ऐच्छिक गणवेश करण्याचे आवाहन केले आहे. शिक्षकांची शाळेतील उपस्थितीची दैनंदिन माहिती जिल्हा परिषदेला असणे गरजेचे आहे. शिक्षकांवर लक्ष ठेवणे हा उद्देश नाही. विद्यार्थी किती उपस्थित आहे, त्याचीही माहिती मिळते. पण शिक्षकांचीही माहिती मिळण्यासाठी बायोमेट्रिक प्रणालीचा वापर केला जाणार आहे. सध्या हे प्रस्तावित असून, शिक्षक संघटनांशी बोलणे सुरू आहे.
