Pune Crime: पुणे पोलिसांकडून शहरात शांतता आणि सुव्यवस्था असल्याचा दावा केला जात असतानाच, शिरूर तालुक्यातून कायदा-सुव्यवस्थेचे वाभाडे काढणारी एक थरारक घटना समोर आली आहे. तालुक्यातील करडे घाटात दोन सराईत गुन्हेगारी टोळ्यांमध्ये जुन्या वैमनस्यातून रक्ताळलेला संघर्ष झाला. दोन्ही गटांनी फिल्मी स्टाईलने एकमेकांचा पाठलाग करत आधी गाड्या एकमेकांवर आदळल्या आणि त्यानंतर बेछुट गोळीबार केला. या टोळीयुद्धात विशाल काळे (वय २१) नावाच्या कुख्यात गुन्हेगाराचा जागीच मृत्यू झाला आहे. या धक्कादायक प्रकारामुळे संपूर्ण शिरूर परिसरात कमालीची दहशत पसरली असून वर्चस्वाच्या लढाईतून गुन्हेगारी पुन्हा एकदा उफाळून आली आहे.
चार गोळ्या झाडल्या, मग डोक्यात घातला दगड
या रक्ताळलेल्या थराराची पार्श्वभूमी एका जुन्या राजकीय हत्याकांडाशी जोडलेली आहे. शिरूरचे नगरसेवक महेंद्र मल्लाव यांच्या हत्या प्रकरणातील मुख्य आरोपी विशाल काळे आणि सनी यादव हे दोघेही अवघ्या दोन दिवसांपूर्वीच जामिनावर तुरुंगातून बाहेर आले होते. शनिवारी संध्याकाळच्या सुमारास करडे घाटात हे दोन्ही गट आमनेसामने आले. सूडभावनेने पेटलेल्या सनी यादवच्या गटाने विशालच्या कारला जोरदार धडक दिली. गाडी थांबताच सनीने विशाल काळेवर एकापाठोपाठ एक चार राऊंड फायर केले. गोळ्या लागून विशाल रक्ताच्या थारोळ्यात पडल्यानंतरही नराधमांचे मन भरले नाही, त्यांनी विशालच्या डोक्यात मोठा दगड घालून त्याची अत्यंत क्रूरपणे हत्या केली आणि तिथून पोबारा केला.
पोलिसांची घटनास्थळी धाव; मुख्य आरोपी फरार
घाटात गोळीबार आणि हत्येचा हा थरार घडल्यानंतर संपूर्ण परिसरात एकच खळबळ उडाली. माहिती मिळताच पुणे ग्रामीण पोलिसांनी आपल्या फौजफाट्यासह तात्काळ करडे घाटात धाव घेतली. पोलिसांनी घटनास्थळाचा पंचनामा करून विशालचा मृतदेह शवविच्छेदनासाठी पाठवला आहे. भरदिवसा घडलेल्या या गँगवारमुळे पोलिसांच्या सुरक्षेच्या दाव्यांवर मोठे प्रश्नचिन्ह निर्माण झाले आहे. या घटनेतील मुख्य संशयित आरोपी सनी यादव आणि त्याचे साथीदार सध्या फरार असून, त्यांच्या अटकेसाठी पोलिसांनी तपास चक्रे फिरवली आहेत.
