Pune Lift Accident: तळेगाव दाभाडे येथील ‘निसर्ग हौसिंग सोसायटी’मध्ये एक काळजाचा थरकाप उडवणारी घटना घडली आहे. लिफ्टमध्ये अडकलेल्या दिनेश सुरंगे या तरुणाला वाचवण्याचे प्रयत्न सुरू असतानाच लिफ्टची मुख्य केबल तुटली आणि उंचावरून लिफ्ट थेट खाली कोसळली. या भीषण अपघातात दिनेशचा जागीच मृत्यू झाला असून, याप्रकरणी सोसायटीच्या ११ पदाधिकाऱ्यांवर सदोष मनुष्यवधाचा गुन्हा दाखल करण्यात आला आहे.
बचावकार्य सुरू असतानाच काळाचा घाला
ही घटना सहाव्या आणि सातव्या मजल्याच्या दरम्यान घडली. दिनेश लिफ्टमध्ये असताना तांत्रिक बिघाडामुळे लिफ्ट अचानक अडकली. सोसायटीतील रहिवासी त्याला धीर देत बाहेर काढण्याचा प्रयत्न करत होते. “घाबरू नकोस, आम्ही तुला सुखरूप बाहेर काढतो,” असे रहिवासी ओरडून सांगत असतानाच अचानक मोठा आवाज झाला. लिफ्टची लोखंडी केबल तुटल्याने लिफ्ट वेगाने खाली आदळली. हा अपघात इतका भीषण होता की दिनेशला सावरण्याची कोणतीही संधी मिळाली नाही.
सोसायटी पदाधिकारी पोलिसांच्या जाळ्यात
दिनेशच्या मृत्यूला व्यवस्थापनाचा हलगर्जीपणा कारणीभूत असल्याचा प्राथमिक निष्कर्ष पोलिसांनी काढला आहे. लिफ्टच्या देखभालीकडे वारंवार दुर्लक्ष केल्याचा ठपका ठेवत वाडा पोलिसांनी कारवाई केली आहे. चेअरमन पुंडलिक वारके यांच्यासह दीपक हेंद्रे, विनायक खोराटे, नीलेश गवळी, प्रवीण श्रीवास अशा एकूण ११ जणांवर गुन्हा नोंदवण्यात आला आहे. लिफ्टची नियमित तपासणी (AMC) वेळेवर झाली होती का? आणि रहिवाशांच्या तक्रारींकडे दुर्लक्ष का केले? या दिशेने पोलीस तपास करत आहेत.
रहिवाशांचा संताप: “आवाज येत होता, पण लक्ष दिले नाही”
या घटनेनंतर सोसायटीतील नागरिकांनी संताप व्यक्त केला आहे. लिफ्टमधून विचित्र आवाज येत असल्याची तक्रार अनेकदा करूनही त्याकडे दुर्लक्ष केल्याचे रहिवाशांचे म्हणणे आहे. एका निष्पाप तरुणाचा बळी गेल्याने संपूर्ण परिसरात शोककळा पसरली असून बहुमजली इमारतींमधील लिफ्टच्या सुरक्षिततेचा प्रश्न पुन्हा एकदा चव्हाट्यावर आला आहे.
