Pune Crime: विद्येचे माहेरघर असलेल्या पुणे शहरात गुन्हेगारीने पुन्हा एकदा डोके वर काढले आहे. कात्रज-कोंढवा रस्त्यावर एका ३१ वर्षीय तरुणाला विवस्त्र करून बेदम मारहाण केल्याची अत्यंत अमानुष घटना उघडकीस आली आहे. केवळ मारहाणच नाही, तर या कृत्याचा व्हिडीओ बनवून पीडिताला ब्लॅकमेल करण्याचा आणि त्याच्यावर गोळीबार करण्याचा खळबळजनक प्रकार समोर आला आहे.
नेमकी घटना काय?
मिळालेल्या माहितीनुसार, पीडित तरुण कोंढवा परिसरात राहतो आणि वाहन खरेदी-विक्रीचा व्यवसाय करतो. त्याचा काही ओळखीच्या व्यक्तींसोबत आर्थिक कारणावरून वाद सुरू होता. याच वादाचा सूड घेण्यासाठी ३१ डिसेंबरच्या रात्री आरोपींनी त्याला कारमधून जबरदस्तीने उचलले आणि त्याचे अपहरण केले.
मैदानात नेऊन अमानुष अत्याचार
आरोपींनी तरुणाला गोकुळनगर परिसरातील एका निर्जन मैदानात नेले. तिथे त्याला विवस्त्र करून लाथा-बुक्क्यांनी अमानुषपणे झोडपून काढले. या संतापजनक कृत्याचा आरोपींनी मोबाईलवर व्हिडीओ रेकॉर्ड केला आणि तो सोशल मीडियावर व्हायरल करण्याची धमकी दिली.
पिस्तुलाचा धाक आणि गोळीबार
या गुंडांचा हैदोस एवढ्यावरच थांबला नाही. संशयित आरोपी मंगेश माने याने कारमधील पिस्तूल काढून तरुणाला जीवे मारण्याची धमकी दिली. तक्रार केल्यास परिणाम वाईट होतील, असे धमकावत आरोपींनी तरुणाच्या दिशेने गोळीबारही केल्याचा आरोप आहे.
नऊ जणांविरुद्ध गुन्हा दाखल
या भयंकर अनुभवानंतर पीडित तरुणाने हिंमत एकवटून येवलेवाडी पोलीस ठाण्यात धाव घेतली. पोलिसांनी याप्रकरणी आयुष कामठे, अभी म्हस्के, अभी पाटील, मंगेश माने कौशल ऊर्फ ऋषी मोरे यांच्यासह एकूण ९ जणांविरुद्ध गंभीर कलमान्वये गुन्हा नोंदवला आहे. सध्या पोलीस फरार आरोपींचा शोध घेत असून शहरात या घटनेमुळे मोठी खळबळ उडाली आहे.
