Pune News : पुण्यात एक धक्कादायक घटना समोर आली असून स्वतःला देवाचा अवतार सांगत महिलेची फसवणूक करून अत्याचार केल्याच्या आरोपावरून स्वयंघोषित धर्मगुरू ऋषिकेश वैद्य याला पुणे पोलिसांनी अटक केली आहे.
पीडित ३५ वर्षीय महिला पुण्यात वास्तव्यास असून तिने वसईतील माणिकपूर पोलीस ठाण्यात तक्रार दाखल केली होती. त्यानंतर हा गुन्हा पुण्यातील हडपसर पोलीस ठाण्यात वर्ग करण्यात आला.
तक्रारीनुसार, २०२३ मध्ये वसई येथे महिलेची ऋषिकेश वैद्य याच्याशी ओळख झाली होती. तिच्या धार्मिक श्रद्धेचा गैरफायदा घेत वैद्यने तिला अध्यात्म शिकवण्याच्या नावाखाली जवळ केले. डिसेंबर २०२३ मध्ये तो पुण्यात आला आणि “मी महादेवाचा अवतार आहे, तू माझी पार्वती आहेस” असे सांगत तिचा विश्वास संपादन केला.
यानंतर त्याने तिला मांजरी परिसरातील एका लॉजमध्ये नेऊन गुंगीकारक पदार्थ देत तिच्यावर अत्याचार केल्याचा आरोप आहे.
नाशिकमधील अशोक खरात प्रकरण उघड झाल्यानंतर पीडित महिलेने धैर्य दाखवत ही बाब आपल्या पतीला सांगितली. त्यानंतर त्यांनी वसई येथे तक्रार दाखल केली आणि पुढील कारवाईसाठी गुन्हा पुण्यात वर्ग करण्यात आला.
दरम्यान, पुणे पोलिसांनी शोधमोहीम राबवत अखेर पिंपरी परिसरातून ऋषिकेश वैद्य याला ताब्यात घेत अटक केली आहे. पुढील तपास हडपसर पोलीस करत आहेत.
