PMC Election: महापालिका निवडणुकीसाठी उमेदवारी अर्ज दाखल करण्याच्या अंतिम टप्प्यात पुण्याचे राजकीय वातावरण कमालीचे तापले आहे. युती आणि जागावाटपाचा घोळ अद्याप सुरू असतानाच, राष्ट्रवादी काँग्रेस (अजित पवार गट) कडून देण्यात आलेल्या उमेदवारीने राजकीय वर्तुळात मोठी खळबळ उडाली आहे.
अजित पवार गटाची मोठी खेळी
कुख्यात गुंड गजा मारणे सध्या कोथरूड मारहाण प्रकरणी कारागृहात असला, तरी त्याच्या पत्नी जयश्री मारणे आता थेट निवडणुकीच्या मैदानात उतरल्या आहेत. अजित पवार गटाने त्यांना प्रभाग क्रमांक १० मधून अधिकृत उमेदवारी (एबी फॉर्म) जाहीर केली आहे. केंद्रीय राज्यमंत्री मुरलीधर मोहोळ यांच्या कार्यकर्त्याला मारणे टोळीने केलेल्या मारहाणीचे प्रकरण ताजे असतानाच, राष्ट्रवादीने मारणे यांच्या पत्नीला तिकीट दिल्याने अनेकांच्या भुवया उंचावल्या आहेत. यासोबतच गुंड आंदेकर गटानेही निवडणुकीत उडी घेतल्याने पुण्यात गुन्हेगारी पार्श्वभूमीच्या उमेदवारांची चर्चा रंगली आहे.
हेही वाचा – Kalyan Dombivli Election : कल्याण-डोंबिवलीत भाजप-शिंदे गटाचा जागावाटपाचा तिढा सुटला; कोण किती जागा लढवणार?
युतीचा तिढा कायम; अर्जासाठी काही तासच शिल्लक
पुण्यात भाजप आणि शिवसेना (शिंदे गट) यांच्यातील युतीबाबत अद्याप कोणतीही अधिकृत घोषणा झालेली नाही. आज सायंकाळी ५ वाजेपर्यंत अर्ज भरण्याची मुदत असून, दुपारपर्यंत अनेक ठिकाणी ‘एबी फॉर्म’चे वाटप प्रलंबित असल्याने उमेदवारांची धाकधूक वाढली आहे.
