पुणे: राष्ट्रवादी काँग्रेसच्या (NCP) नव्या प्रवक्त्यांच्या यादीतून रुपाली पाटील ठोंबरे (Rupali Patil Thombare) यांना वगळल्यानंतर राजकीय वर्तुळात खळबळ माजली आहे. अजित पवारांच्या गटाने त्यांच्यावर कारवाई केल्यानंतर लगेचच शिवसेना (उद्धव बाळासाहेब ठाकरे गट) नेत्या सुषमा अंधारे (Sushma Andhare) यांनी ठोंबरे यांना खुली ऑफर दिली आहे. ‘रूपाली माझी चांगली मैत्रीण आहे. ती स्वच्छ प्रतिमेची, निर्भय आणि मुद्द्यांवर बोलणारी महिला आहे. जर ती आमच्या शिवसेनेत यायचं ठरवलं, तर आम्ही तिचं मनापासून स्वागत करू,’ असं सुषमा अंधारे म्हणाल्या.
अंधारे यांनी पुढे म्हटलं आहे की, ‘रूपाली ठोंबरे ही ईडी-सीबीआयच्या भीतीशिवाय, स्वच्छ प्रतिमेची महिला आहे. ती कुठल्याही पक्षात गेली तरी तिचं स्वागत होणारच. पण माझ्या पक्षात यावी म्हणून मी इतर पक्षात तिचं नुकसान व्हावं, असा विचार करणारी नाही.’
दरम्यान, अजित पवार गटाने जाहीर केलेल्या नव्या प्रवक्त्यांच्या यादीतून रुपाली ठोंबरे आणि आमदार अमोल मिटकरी यांना वगळण्यात आलं आहे. गेल्या काही दिवसांत राष्ट्रवादी काँग्रेसमध्ये रुपाली चाकणकर विरुद्ध रुपाली ठोंबरे असा वाद चांगलाच चिघळला होता. या वादाचा फटका अखेर ठोंबरे यांना बसल्याचं बोललं जात आहे.
रूपाली ठोंबरे यांनी नुकतीच अजित पवार यांची भेट घेऊन स्पष्टीकरण दिलं होतं, मात्र त्यानंतरही त्यांना यादीत स्थान मिळालं नाही. उलट, वादग्रस्त मारहाण प्रकरणानंतर चर्चेत आलेल्या सुरज चव्हाण यांना पुन्हा प्रवक्तेपद देण्यात आलं आहे. या घडामोडींमुळे राष्ट्रवादीच्या अंतर्गत गोटात अस्वस्थता पसरली असून, ठोंबरे यांच्या पुढील राजकीय पावलांकडे सर्वांचे लक्ष लागले आहे. ठाकरे गटाकडून आलेल्या ऑफरमुळे या नाट्यमय वादाला आता नवा ट्विस्ट मिळाल्याचं स्पष्ट दिसतंय.
