Leopard Attack: जुन्नर तालुक्यातील बिबट्यांच्या हल्ल्यांच्या घटना थांबण्याचे नाव घेत नाहीयेत. बुधवारी रात्री नारायणगाव-जुन्नर रस्त्यालगत साकार नगरी सोसायटीजवळ एक तरुणावर बिबट्याने हल्ला केला. यामुळे परिसरात भीतीचे वातावरण निर्माण झाले आहे. प्राप्त माहितीनुसार, तनिष नवनाथ परदेशी (वय १८) हा तरुण रात्री सव्वा आठ वाजताच्या सुमारास साकार नगरी सोसायटीजवळ फोनवर बोलत उभा होता. मोबाईलमध्ये गुंग असलेल्या त्या तरुणाला आजूबाजूच्या धोका जाणवत नव्हता, आणि याचवेळी बिबट्याने अचानक झेप घेतली. हल्ल्यात तनिषच्या पायाला मोठी दुखापत झाली. मात्र तो मोठ्या अपघातापासून वाचला. हल्ल्यानंतर तनिषला तातडीने नारायणगाव ग्रामीण रुग्णालयात दाखल करण्यात आले. सध्या त्याची प्रकृती स्थिर आहे.
हेही वाचा – ओतूर येथे बिबट्याचा थरार! शेतकऱ्यावर जीवघेणा हल्ला; ग्रामस्थांच्या तत्परतेने बचाव
परिसरात तीन बिबटे आढळले
घटनेची माहिती मिळताच वन विभागाचे पथक घटनास्थळी पोहोचले. ड्रोन पाहणीनुसार, घटनास्थळापासून केवळ २०० फूट अंतरावर वारुळवाडीतील मीनाक्षी कृपा वसतीगृह परिसरात तीन बिबटे आढळले. सदर परिसरात बिबट्यांनी मागील दिवशीच चार पाळीव प्राण्यांवर हल्ला केला होता. यामुळे नागरिक आणि विद्यार्थ्यांमध्ये भीतीचे वातावरण पसरले आहे.
हेही वाचा – Pune School: बिबट्यामुळे पुण्यातील ‘या’ शाळांच्या वेळा बदलल्या; काय आहे कारण आणि नवीन वेळ?
जुन्नर तालुक्यात बिबट्यांच्या हल्ल्यांत वाढ
वन विभागाने वाढत्या धोके लक्षात घेऊन परिसरात आठ पिंजरे लावले आहेत, तसेच नागरिकांना रात्रीच्या वेळी बाहेर न जाण्याचा आणि बिबट्या आढळल्यास तत्काळ वनविभागाशी संपर्क साधण्याचा सल्ला दिला आहे. गेल्या काही दिवसांत जुन्नर तालुक्यातील ओतूर, शेटेवाडी, शिवनेरी आणि नारायणगाव भागात बिबट्यांचे हल्ले वाढल्याचे आढळून आले आहे, ज्यामुळे शेतकरी आणि ग्रामस्थांमध्ये दहशत पसरली आहे.
