Pune Crime : पुण्यातील कल्याणीनगर-संगमवाडी रस्त्यावर शनिवारी भरदिवसा एका महिला चालकाने क्रूरतेचा कळस गाठला. किरकोळ वादाचे रूपांतर जीवघेण्या थरारात झाले असून, एका तरुणाला कारच्या बोनेटवर तब्बल २ किलोमीटरपर्यंत फरफटत नेल्याची धक्कादायक घटना घडली आहे. या घटनेचा अंगावर काटा आणणारा व्हिडिओ सोशल मीडियावर वेगाने व्हायरल होत आहे.
नेमकी घटना काय?
शनिवारी दुपारी १२:३० च्या सुमारास कल्याणीनगरकडून संगमवाडीकडे जाणाऱ्या रस्त्यावर एका महिला कारचालक आणि इनोव्हा चालक यांच्यात गाडी घासल्याच्या कारणावरून वाद झाला. हा वाद इतका विकोपाला गेला की, इनोव्हा चालकाने महिलेची गाडी अडवण्यासाठी स्वतःचे वाहन रस्त्यात आडवे लावले. त्यानंतर तो तरुण महिलेच्या कारसमोर येऊन तिला जाण्यापासून रोखू लागला.
संतापलेली महिला आणि २ किमीचा जीवघेणा प्रवास
प्रत्यक्षदर्शींनी दिलेल्या माहितीनुसार, समोर तरुण उभा असतानाही महिला चालकाने रागाच्या भरात गाडीचा वेग वाढवला. स्वतःचा जीव वाचवण्यासाठी तरुण थेट कारच्या बोनेटवर चढला. मात्र, माणुसकी विसरलेल्या त्या महिलेने गाडी न थांबवता तशाच अवस्थेत तरुणाला बोनेटवर लटकवून सुमारे २ किलोमीटरपर्यंत गाडी सुसाट पळवली. रस्त्यावरील नागरिक आरडाओरडा करत होते, मात्र महिला गाडी थांबवण्यास तयार नव्हती.
अचानक ब्रेक लावला अन तरुण कोसळला
काही अंतर कापल्यानंतर महिलेने अचानक जोरात ब्रेक दाबल्याने बोनेटवर असलेला तरुण रस्त्यावर फेकला गेला. यात त्याला गंभीर दुखापत झाली आहे. योगायोगाने परिसरात व्हीआयपी (VIP) बंदोबस्तासाठी पोलीस तैनात होते, त्यांनी तातडीने हस्तक्षेप करत जखमी तरुणाला रुग्णालयात दाखल केले. सुदैवाने, सध्या त्याची प्रकृती स्थिर असल्याची माहिती डॉक्टरांनी दिली आहे.
पुणे : दोन कारचालकांमध्ये वाद; महिला संतापली, कारसमोर असलेल्या तरुणाला 2 किमी फरफटत नेलं; पुण्यातील धक्कादायक VIDEO pic.twitter.com/IDMLmwtgaM
— Prashant Patil (@Prashant_P95) January 20, 2026
पोलिस कारवाई सुरू
या घटनेमुळे संगमवाडी परिसरात काही काळ तणाव निर्माण झाला होता. पोलिसांनी दिलेल्या माहितीनुसार, दोन्ही वाहनांच्या चालकांची चौकशी सुरू आहे. परिसरातील सीसीटीव्ही फुटेज ताब्यात घेण्यात आले असून पुढील कायदेशीर कारवाई केली जात आहे. रस्त्यावरील वादातून कोणाचाही जीव धोक्यात घालणे गंभीर गुन्हा असून, त्या दिशेने तपास सुरू आहे.
