Pune Municipal Corporation Election : लोकशाहीचा उत्सव साजरा करायला आलो की स्वतःचं पुरुषत्व सिद्ध करायला? असा संतप्त सवाल विचारण्याची वेळ पुण्यातील एका ज्येष्ठ नागरिकावर आली. पुणे महानगरपालिका निवडणुकीच्या मतदानादरम्यान, मतदार यादीतील एका विचित्र चुकीमुळे रवींद्र नावाच्या मतदाराला चक्क आपण ‘पुरुष’ असल्याचे सिद्ध करण्यासाठी आधार कार्डचा आधार घ्यावा लागला. प्रशासनाच्या या भोंगळ कारभाराचा व्हिडीओ सध्या इंटरनेटवर वणव्यासारखा पसरला असून, यामुळे निवडणूक प्रक्रियेतील त्रुटी पुन्हा एकदा चव्हाट्यावर आल्या आहेत.
काय आहे नेमकं प्रकरण?
नेहमीप्रमाणे उत्साहात मतदानासाठी गेलेल्या रवींद्र नावाच्या या काकांचा गोंधळ तेव्हा उडाला, जेव्हा मतदान केंद्रावरील यादीत त्यांच्या नावासमोर एका अज्ञात महिलेचा फोटो झळकला. नावात ‘रवींद्र’ हे नाव स्पष्टपणे दिसत असूनही, केवळ फोटो महिलेचा असल्याने निवडणूक ड्युटीवर असलेल्या अधिकाऱ्यांनी त्यांना मतदानापासून रोखले. या चुकीबद्दल विचारणा केली असता, “यादीत जे आहे तेच आम्ही मानणार,” असे उत्तर देत अधिकाऱ्यांनी सुरुवातीला मदत करण्यास नकार दिला आणि आपली जबाबदारी झटकली.
माझ्या नावासमोर बाईचा फोटो आहे. मी त्यांना म्हणालो की बाईचे नाव रवींद्र असेल का? तर ते म्हणाले आम्हाला सांगू नका!
(काकांना विचारल की महिला परिचयाची आहे का? तर लाजले)#पुणेरीकाका #पुणे ❤️#निवडणूक 🥁#उत्सव_लोकशाहीचा pic.twitter.com/Gp3c1LPOsY
— Omkar Wable (@omkarasks) January 15, 2026
पुराव्याची लढाई आणि मतदानाचा हक्क
आपला मतदानाचा हक्क सोडायचा नाही, या जिद्दीने काकांनी तातडीने पुन्हा घर गाठले. त्यांनी आपले मूळ आधार कार्ड आणून दिले आणि आपणच ‘तो’ रवींद्र आहोत हे पुराव्यासह सिद्ध केले. या कसरतीनंतरच त्यांना मतदान कक्षात प्रवेश मिळून मतदानाचा हक्क बजावता आला. मात्र, एका ज्येष्ठ नागरिकाला ऐन मतदानाच्या वेळी उन्हात घराच्या फेऱ्या माराव्या लागल्या, याबद्दल उपस्थित नागरिकांनी आणि प्रत्यक्षदर्शींनी तीव्र संताप व्यक्त केला आहे.
प्रशासकीय दाव्यांची पोलखोल
निवडणूक आयोग नेहमीच मतदार यादी शुद्धीकरण आणि अचूकतेचे मोठे दावे करत असतो, मात्र प्रत्यक्ष मैदानात आलेल्या या अनुभवामुळे या दाव्यांमधील फोलपणा उघड झाला आहे. ‘X’ (ट्विटर) वर या घटनेचा व्हिडीओ व्हायरल झाल्यानंतर नेटकऱ्यांनी निवडणूक आयोगाच्या कार्यक्षमतेवर मिश्किल टिप्पणी करत टीकेचा वर्षाव केला आहे. “रवींद्र नावाच्या माणसाला जर स्वतःची ओळख पटवण्यासाठी एवढी कसरत करावी लागत असेल, तर यादी बनवणारे कर्मचारी नेमके काय करत होते?” असा रोखठोक प्रश्न आता सर्वसामान्यांमधून विचारला जात आहे.
