Pune PMC Election : पुणे महानगरपालिकेच्या सत्तेच्या चाव्या कोणाच्या हाती जाणार, याचा फैसला १६ जानेवारीला होणार असून प्रशासकीय यंत्रणा मतमोजणीसाठी सज्ज झाली आहे. यंदाच्या निवडणुकीत प्रभागांची रचना आणि फेऱ्यांचे गणित पाहता, काही प्रभागांचे निकाल दुपारपूर्वीच स्पष्ट होणार आहेत. निवडणूक उपायुक्त प्रसाद काटकर यांनी दिलेल्या माहितीनुसार, मतमोजणीच्या नियोजनाचा आराखडा अंतिम करण्यात आला आहे.
सकाळी ११:३० ला गुलाल उधळणार?
१५ जानेवारीला मतदानाची प्रक्रिया पार पडल्यानंतर दुसऱ्या दिवशी, म्हणजेच १६ जानेवारीला मतमोजणीला प्रारंभ होईल. एकूण ४१ प्रभागांमधील १६५ जागांसाठी ही लढत होत आहे. एका फेरीसाठी साधारण ३० मिनिटांचा अवधी लागणार असून, सकाळी ११:३० वाजेपर्यंत पुण्याचा पहिला अधिकृत निकाल जाहीर होण्याची शक्यता प्रशासनाने वर्तवली आहे.
निकाल लवकर कुठे आणि उशिरा कुठे?
सर्वात वेगवान निकाल: बिबवेवाडी, कसबा-विश्रामबाग आणि कोंढवा-येवलेवाडी या क्षेत्रीय कार्यालयांच्या अंतर्गत येणाऱ्या १३ प्रभागांचे निकाल सर्वात आधी जाहीर होतील. येथे केवळ १२ फेऱ्या होणार असल्याने चित्र लवकर स्पष्ट होईल.
निकालाला विलंब कुठे?
धनकवडी-सहकारनगर क्षेत्रीय कार्यालयांतर्गत सर्वाधिक २० फेऱ्या होणार आहेत. तसेच प्रभाग क्रमांक ३८ (बालाजीनगर-आंबेगाव-कात्रज) येथे ५ सदस्यांचा प्रभाग असल्याने मतमोजणीसाठी अधिक वेळ खर्ची पडेल. दरम्यान, पुणे महापालिका निवडणूक उपायुक्त, प्रसाद काटकर यांनी सांगितलं की, मतमोजणीची प्रत्येक फेरी सरासरी ३० मिनिटांची असेल. दुपारी ४ वाजेपर्यंत संपूर्ण शहराचे राजकीय चित्र स्पष्ट होईल, अशा पद्धतीने आम्ही सूक्ष्म नियोजन केले आहे.
