Pune Rain Update: महाराष्ट्रात दाखल झालेला मान्सून वेगाने पुढे सरकत असून मंगळवारी त्याने सोलापूर आणि आसपासच्या दक्षिण भागांमध्ये धडक दिली आहे. पुढील ४८ तास मान्सूनच्या वाटचालीसाठी अत्यंत पोषक असल्याचा अंदाज भारतीय हवामानशास्त्र विभागाने (IMD) वर्तवला आहे. मात्र, पुणे शहरात अधिकृत मान्सून पोहोचण्यासाठी अजून काही दिवसांचा अवधी लागणार असला, तरी पुणेकरांना लवकरच उकाड्यापासून मोठा दिलासा मिळण्याची शक्यता आहे.
यंदा जून महिन्याचा पहिला आठवडा उलटला तरी पुणेकरांना पावसाने हुलकावणी दिली आहे. सामान्यतः १ ते १० जून दरम्यान शहरात सरासरी ४९ मिमी पाऊस पडतो, ज्यामध्ये मान्सूनपूर्व (वळवाच्या) पावसाचा वाटा मोठा असतो. पण यंदा जून उजाडला तरी पुण्याची पावसाची नोंद चक्क ‘शून्य’ आहे. याउलट गेल्या वर्षी मे आणि जून महिन्यात पावसाने धुवांधार बॅटिंग केली होती. यंदा मे महिन्यातही मोजकाच पाऊस पडल्याने आणि जूनच्या सुरुवातीलाही कोरडे हवामान असल्याने पुणेकर पावसाची चातकासारखी वाट पाहत आहेत.
हवामानात बदल: उकाड्यापासून किंचित दिलासा
पुणे जिल्ह्याच्या ग्रामीण भागात गेल्या चार दिवसांत काही ठिकाणी विजांच्या कडकडाटासह पाऊस झाला असला, तरी मुख्य शहरात मात्र अद्याप पावसाची प्रतीक्षा कायम आहे. गेल्या दोन दिवसांपासून शहरात दुपारनंतर गार वारे सुटत असल्याने नागरिकांना कडक ऊन आणि घामाच्या धारांपासून थोडा आराम मिळाला आहे. संध्याकाळच्या वेळी आकाश ढगाळ होत असल्याने हवामान आल्हाददायक वाटत असले, तरी रात्रीचे तापमान अजूनही सरासरीपेक्षा जास्त असल्याने रात्रीचा उकाडा कायम आहे.
पुण्यात कधी बरसणार पाऊस? आयएमडीचा अंदाज
“पुढील दोन दिवसांत पुण्याच्या हवामानात लक्षणीय बदल पाहायला मिळतील. कमाल तापमानात किंचित घट होईल आणि दुपारनंतर ढगांची गर्दी होऊ लागेल. विशेषतः गुरुवारनंतर शहरात ढगांचा गडगडाट, विजांचा कडकडाट आणि जोरदार वादळी वाऱ्यांसह पावसाची जोरदार हजेरी लागेल,” अशी माहिती ‘आयएमडी’चे वरिष्ठ हवामानशास्त्रज्ञ डॉ. एस. डी. सानप यांनी दिली आहे.
