Pune Crime: पुणे पोलीस गुंडांवर कारवाई करत असताना शहरातील कुख्यात गुंड निलेश घायवळ मात्र लंडनमध्ये ऐशआरामात राहत असल्याची धक्कादायक माहिती समोर आली आहे. कोथरुडमधील गोळीबार प्रकरणानंतर त्याच्यावर महाराष्ट्र संघटित गुन्हेगारीविरोधी कायदा (मकोका) लावण्यात आला आहे. परंतु, हत्या, खंडणी, अपहरण आणि मारामारीसारख्या गंभीर गुन्ह्यांमध्ये सामील असलेल्या घायवळला पासपोर्ट कसा मिळाला, याबद्दल गंभीर प्रश्न उपस्थित झाले आहेत.
पोलीस आयुक्त अमितेश कुमार यांनी निलेश घायवळसह 10 जणांवर मकोकांतर्गत कारवाई केली आहे. या प्रकरणात मयूर गुलाब कुंबरेसह काही जणांना अटक झाली असून उर्वरित आरोपी फरार आहेत. घायवळविरुद्ध लूकआऊट नोटीस जारी करण्यात आली असून तो भारतात परतल्यास त्वरित अटक केली जाईल, असे पोलिसांनी स्पष्ट केले आहे.
मिळालेल्या माहितीनुसार, घायवळने आपल्या गुन्हेगारी कृत्यांमधून मोठ्या प्रमाणात पैसा कमावला असून त्यातून लंडनमध्ये घर विकत घेतले आहे. त्याचा मुलगाही सध्या लंडनमध्ये शिक्षण घेत आहे. कोथरुडमधील गोळीबाराची घटना 17 सप्टेंबर रोजी घडली होती. क्षुल्लक कारणावरून झालेल्या वादातून प्रकाश मधुकर धुमाळ (वय 36) या तरुणावर गोळीबार करण्यात आला होता.
हेही वाचा – ब्रेकिंग..! पुण्यात गोळीबाराचा थरार; घायवळ टोळीचा मध्यरात्री हल्ला, शहर पुन्हा हादरलं
त्यानंतर घायवळ टोळीने आणखी एका व्यक्तीवर कोयत्याने वार करून गंभीर जखमी केले होते. या घटनांनंतर गुंडगिरी करणाऱ्या घायवळ टोळीच्या हालचालींवर प्रश्नचिन्ह निर्माण झाले असून, टोळीचा म्होरक्या लंडनमध्ये मोकाट फिरतोय ही बाब पुणे पोलिसांसाठी मोठं आव्हान ठरली आहे.
