पुणे: पुण्यामध्ये गुन्हेगारीचे सत्र दिवसेंदिवस सुरूच आहे. शहरातील चंदननगर परिसरात मध्यरात्री घडलेल्या धक्कादायक प्रकार घडली आहे. भंगाराच्या दुकानात चोरीच्या उद्देशाने घुसलेल्या चोरट्याला दुकानमालक आणि कामगारांनी पकडून रात्रभर बेदम मारहाण केली. या मारहाणीत एका चोरट्याचा मृत्यू झाल्याची धक्कादायक घटनासमोर आली आहे. तर, दोघे गंभीर जखमी झाले आहेत. मृत चोरट्याचं नाव नवाज इम्तियाज खान (वय २६) असं आहे.
ही घटना रात्री ३ च्या सुमारास चंदननगर परिसरात घडली. मिळालेल्या माहितीनुसार, तिघे चोरटे चोरीसाठी एका भंगाराच्या दुकानात शिरले होते. मात्र त्यावेळी दुकानातील काही कामगार जागे झाले आणि त्यांनी चोरट्यांना पकडलं. संतापलेल्या कामगारांनी चोरट्यांचे हातपाय बांधून त्यांना बेदम मारहाण केली.
या मारहाणीत नवाज खान या चोरट्याचा जागीच मृत्यू झाला. उर्वरित दोन साथीदार गंभीर जखमी झाले आहेत. सकाळी घटनेची माहिती पोलिसांना मिळताच चंदननगर पोलिसांनी घटनास्थळी धाव घेतली. जखमी चोरट्यांना उपचारासाठी ससून रुग्णालयात दाखल करण्यात आले, तर मृत नवाज खानचा मृतदेह शवविच्छेदनासाठी पाठवण्यात आला आहे. या घटनेनंतर पोलिसांनी दुकान मालक आणि संबंधित काही कामगारांना ताब्यात घेतले असून घटनेचा अधिक तपास सुरू आहे.
