Shalinitai Patil Death: महाराष्ट्राच्या राजकारणातील एक कणखर नेतृत्व आणि माजी मुख्यमंत्री वसंतदादा पाटील यांच्या पत्नी शालिनीताई पाटील यांचे वयाच्या ९४ व्या वर्षी निधन झाले. मुंबईतील माहीम येथील निवासस्थानी त्यांनी अखेरचा श्वास घेतला. गेल्या काही महिन्यांपासून त्या वृद्धत्वामुळे उद्भवलेल्या आजारांशी झुंज देत होत्या.
राजकीय कारकीर्द
शालिनीताईंचा राजकीय प्रवास अत्यंत प्रेरणादायी आणि तितकाच चर्चेचा राहिला. केवळ वसंतदादांच्या पत्नी ही ओळख पुसून त्यांनी स्वतःचे स्वतंत्र अस्तित्व निर्माण केले होते. त्यांनी सांगली लोकसभा मतदारसंघाचे प्रतिनिधित्व केले. तसेच, सातारा जिल्ह्यातील कोरेगाव विधानसभा मतदारसंघातून १९९९ ते २००९ या काळात त्या सलग आमदार म्हणून निवडून आल्या होत्या. १९८० च्या दशकात त्यांनी राज्य मंत्रिमंडळात महत्त्वाची मंत्रिपदे भूषवली होती.
हेही वाचा – Maharashtra Politics : एकनाथ शिंदेंचा काँग्रेसला मोठा धक्का; अनेक बड्या नेत्याने घेतलं धनुष्यबाण हाती
खंबीर आणि करारी व्यक्तिमत्व
शालिनीताई पाटील या त्यांच्या स्पष्टवक्तेपणासाठी ओळखल्या जात. १९८१ मध्ये तत्कालीन मुख्यमंत्री ए. आर. अंतुले यांना राजीनामा देण्यास भाग पाडण्यामागे त्यांची भूमिका अत्यंत महत्त्वाची मानली जाते. राजकीय चढ-उतारात त्यांनी अनेकदा पक्षांतर केले किंवा अपक्ष निवडणुका लढवल्या, मात्र त्यांनी आपली विचारधारा कधीच सोडली नाही.
कोरेगावमध्ये होणार अंत्यसंस्कार
शालिनीताईंच्या निधनामुळे काँग्रेससह संपूर्ण राजकीय आणि सामाजिक क्षेत्रात शोककळा पसरली आहे. त्यांचे पार्थिव त्यांच्या मूळ गावी, सातारा जिल्ह्यातील कोरेगाव येथे नेण्यात येणार असून, तिथेच त्यांच्यावर शासकीय इतमामात अंत्यसंस्कार पार पडणार आहेत.
