Eknath Shinde Delhi Visit: मुंबई महानगरपालिकेच्या सत्तासंघर्षाचा अंतिम निर्णय आता दिल्लीतूनच होणार असल्याचे स्पष्ट झाले आहे. निकाल लागून पाच दिवस उलटले तरी महापौरपदाचा सस्पेन्स अद्याप कायम आहे. दरम्यान, उपमुख्यमंत्री एकनाथ शिंदे यांनी कोणालाही सुगावा लागू न देता अचानक दिल्ली गाठल्याने राजकीय वर्तुळात मोठी खळबळ माजली आहे. भाजपच्या वरिष्ठ नेत्यांशी झालेल्या या गुप्त भेटीमुळे मुंबईच्या सत्तेचा ‘रिमोट कंट्रोल’ आता दिल्लीत गेल्याच्या चर्चांना उधाण आले आहे.
सत्तावाटपावरून रस्सीखेच
मुंबईत भाजप आणि शिंदे गट यांच्यात सत्तावाटपावरून मोठी रस्सीखेच सुरू असतानाच मंगळवारी रात्री एक महत्त्वाची घडामोड घडली. मिळालेल्या माहितीनुसार, उपमुख्यमंत्री एकनाथ शिंदे यांनी अत्यंत गोपनीय पद्धतीने दिल्लीचा दौरा केला. या दौऱ्यात भाजपचे मुंबई अध्यक्ष अमित साटम आणि खासदार राहुल शेवाळे यांच्या उपस्थितीत भाजपच्या वरिष्ठ नेत्यांशी महत्त्वाची चर्चा झाली. शिंदे गट आपल्या काही विशिष्ट मागण्यांवर ठाम असल्यानेच हा ‘सरप्राईज’ दिल्ली दौरा आयोजित करण्यात आल्याचे बोलले जात आहे.
संख्याबळाच्या गणिताचा विचार केला तर मुंबई महापालिकेच्या २२७ जागांपैकी भाजप ८९ जागांसह सर्वात मोठा पक्ष ठरला आहे. मात्र, बहुमताचा ११४ हा आकडा गाठण्यासाठी त्यांना शिंदे गटाच्या २९ नगरसेवकांचे समर्थन मिळवणे अपरिहार्य आहे. भाजप आणि शिंदे गट एकत्र आल्यास हे संख्याबळ ११८ पर्यंत पोहोचते, जे बहुमतापेक्षा ४ ने जास्त आहे. आपल्या नगरसेवकांची फूट टाळण्यासाठी शिंदे गटाने त्यांची प्रमाणपत्रे आधीच जमा करून घेतली होती. हॉटेलमधील मुक्काम संपवून या नगरसेवकांना घरी पाठवताच शिंदेंनी तातडीने दिल्ली गाठली.
या दिल्लीतील बैठकीत केवळ मुंबईच्या महापौरपदावरच चर्चा झालेली नाही, तर एमएमआर (MMR) क्षेत्रातील इतर महत्त्वाच्या महापालिकांबाबतही रणनीती ठरल्याचे समजते. ठाणे आणि कल्याण-डोंबिवली महापालिकेतही सत्तावाटपाचा कोणता फॉर्म्युला राबवायचा, यावर या बैठकीत शिक्कामोर्तब होण्याची शक्यता आहे. थोडक्यात सांगायचे तर, शिंदे गटाच्या आक्रमक भूमिकेमुळे मुंबईच्या महापौरपदाची माळ नेमकी कोणाच्या गळ्यात पडणार, याचे उत्तर आता दिल्लीतील या हायव्होल्टेज चर्चेनंतरच स्पष्ट होईल.
