नागपूर : उपराजधानी नागपूरजवळील बुटिबोरी MIDC परिसरात अवाडा (Avaada) कंपनीत आज सकाळी ११ वाजता मोठी दुर्घटना घडली. सोलर पॅनल उत्पादन करणाऱ्या या कंपनीत निर्माणाधीन असलेली पाण्याची टाकी अचानक कोसळली. या दुर्घटनेत आतापर्यंत ३ कामगारांचा मृत्यू झाला असून, ८ जण जखमी झाले आहेत. जखमींवर जवळच्या रुग्णालयात उपचार सुरू आहेत.
प्राथमिक माहितीनुसार, टाकीचे काम अंतिम टप्प्यात होते. काम करत असलेले अनेक कामगार टाकी कोसळताना त्याखाली दबले गेले. मलब्याखाली आणखी काही कामगार अडकले असण्याची भीती व्यक्त केली जात आहे. दुर्घटनेचे कारण अद्याप स्पष्ट नाही, मात्र वॉटर प्रेशरमुळे टाकी कोसळल्याची प्राथमिक शक्यता वर्तवली जात आहे. मृतांचा आकडा वाढण्याची शक्यता नाकारता येत नाही.
दुर्घटनेची माहिती मिळताच पोलीस अधीक्षक हर्ष पोतदार यांच्यासह पोलीस पथक आणि बचाव दल घटनास्थळी दाखल झाले. बचावकार्य युद्धपातळीवर सुरू आहे. नागपूर-चंद्रपूर महामार्गालगत असलेल्या या परिसरात खळबळ उडाली आहे. या दुर्घटनेमुळे औद्योगिक क्षेत्रातील सुरक्षेच्या नियमांवर पुन्हा प्रश्न उपस्थित झाले आहेत. बचावकार्य पूर्ण झाल्यानंतर अधिकृत माहिती समोर येईल.
