Nagpur Crime: नागपुरातून अत्यंत खळबळजनक बातमी समोर येत आहे. उपराजधानीतील कळमेश्वर रोडवरील फेटरी परिसरात एका हॉटेलमध्ये प्रेमसंबंधांचा रक्तरंजित अंत झाला आहे. अवघ्या २१ वर्षांच्या तरुणीची तिच्याच प्रियकराने हॉटेलच्या खोलीत गळा चिरून हत्या केल्याने नागपूर जिल्हा हादरला आहे. गुरुवारी घडलेल्या या घटनेमुळे हॉटेल व्यवसायातील सुरक्षेचा प्रश्न पुन्हा ऐरणीवर आला आहे.
नेमकं काय घडलं?
मूळची आष्टी खुर्द येथील आणि सध्या गिट्टीखदान भागात राहणारी रुचिता राजेंद्र भांगे (वय २१) ही तिचा प्रियकर सौरभ जामगडे (वय २४) याच्यासोबत फेटरी येथील एका ओयो (OYO) हॉटेलमध्ये आली होती. दोघेही खोलीत गेल्यानंतर त्यांच्यात कोणत्यातरी कारणावरून तीव्र वाद झाला. रागाच्या भरात सौरभने आपल्याकडे असलेला चाकू काढून रुचिताच्या गळ्यावर वार केले.
रक्तबंबाळ अवस्थेत तरुणीचा मृत्यू
हा हल्ला इतका भीषण होता की, आरडाओरडा ऐकून हॉटेल कर्मचारी खोलीकडे धावेपर्यंत रुचिताचा प्रचंड रक्तस्राव झाला होता. काही वेळातच तिचा मृत्यू झाला. दरम्यान, आपण पकडले जाऊ या भीतीने आरोपी सौरभने हॉटेलच्या पहिल्या मजल्यावरून खाली उडी मारली आणि तिथून पळ काढला.
पोलिसांचा तपास आणि शोधमोहीम
दरम्यान, पोलीस हॉटेलमधील सीसीटीव्ही कॅमेऱ्यांची तपासणी करत असून आरोपी नेमका कोणत्या दिशेला पळाला याचा माग काढला जात आहे. कळमेश्वर पोलिसांनी खुनाचा गुन्हा दाखल केला असून फरार सौरभच्या अटकेसाठी पथके रवाना करण्यात आली आहेत. रुचिताचा मृतदेह ताब्यात घेऊन शासकीय रुग्णालयात पाठवण्यात आला आहे.
वादाचे कारण अस्पष्ट
दरम्यान, दोघेही एकाच गावचे रहिवासी असून त्यांच्यात दीर्घकाळापासून प्रेमसंबंध होते. मात्र, हॉटेलमध्ये नक्की कोणत्या विषयावरून वाद झाला आणि सौरभने टोकाचे पाऊल का उचलले, याचा तपास पोलीस करत आहेत. शहरातील वाढत्या हिंसक घटनांमुळे नागरिकांमध्ये चिंतेचे वातावरण आहे.
