कोल्हापूर : कसबा बावडा शुगर मिल ते शिये रोडवर रस्त्याकडेला दुचाकी उभी करून गांजाच्या पुड्या विक्री करणाऱ्या तरुणास एलसीबीच्या पथकाने सापळा रचून अटक केली. त्याच्याकडून ३ किलो गांजा, दुचाकी असा १ लाख ३७ हजार रुपयांचा मुद्देमाल जप्त केला आहे. शनिवारी सकाळी ही कारवाई केली. सचिन शामराव पाटील (वय ३५, रा. शाहूनगर, राजारामपुरी, कोल्हापूर) असे अटक केलेल्याचे नाव आहे.
स्थानिक गुन्हे अन्वेषणचे पोलीस निरीक्षक रवींद्र कळमकर यांनी पथके नेमली आहेत. या पथकातील शुभम संकपाळ व विशाल चौगले यांना गोपनीय सूत्रांकडून माहिती मिळाली की, एक तरुण शुगर मिल ते शिये रोडवर रस्त्याकडेला दुचाकी उभी करून गांजाच्या लहान पुड्या करून विक्री करतो.
एलसीबीच्या पथकाने दोन दिवस या रोडवर गस्त चालू ठेवली होती. शनिवारी सकाळी १० वाजण्याच्या सुमारास संशयित सचिन पाटील शिये रोडवर एका मंगल कार्यालयापासून थोड्या अंतरावर रस्त्याकडेला आपली दुचाकी उभी करून गांजा विक्री करत होता. ग्राहक त्यांच्याकडे येऊन गांजा घेऊन जात होते. पथकाने त्याला ताब्यात घेतले. त्यावेळी त्याच्याकडे तब्बल ३ किलो १०० ग्रॅम गांजा सापडला.
हा गांजा त्याने कोठून आणला, त्याचे नियमित ग्राहक कोण आहेत, किती दिवसांपासून तो हा व्यवसाय करत होता, याची माहिती पोलीस घेत आहेत. याबाबत शाहूपुरी पोलीस ठाण्यात गुन्हा दाखल केला आहे. या कारवाईत पोलीस उपनिरीक्षक संतोष गळवे, पोलीस अंमलदार अशोक पोवार, सचिन पाटील, शुभम संकपाळ, लखनसिंह पाटील, विलास किरोळकर, अरविंद पाटील, विजय इंगळे, संदीप बेद्रे, सागर माने, संजय कुंभार, महेश पाटील, महेश खोत, अमित सर्जे यांनी सहभाग घेतला.
