Satara News : सातारा तालुक्यातील कासरतळे येथे झालेल्या भीषण अपघाताने संपूर्ण परिसर हादरला आहे. रस्त्याच्या कडेला उभा असलेला आयशर ट्रक अचानक ५० फूट खोल दरीत कोसळल्याने चार जणांचा जागीच मृत्यू झाला. मृतांमध्ये एका लहान मुलासह तीन महिलांचा समावेश असल्याने हळहळ व्यक्त केली जात आहे.
मिळालेल्या माहितीनुसार, पुनर्वसन झाल्यानंतर संबंधित कुटुंब आपले घरगुती साहित्य ट्रकमध्ये भरून नवीन ठिकाणी स्थलांतर करत होते. सर्व सामान भरल्यानंतर ट्रक रस्त्याच्या कडेला उभा असताना अचानक तोल जाऊन वाहन थेट खोल दरीत कोसळले. हा अपघात इतका अचानक घडला की कोणालाही सावरण्याची संधी मिळाली नाही.
ट्रकमध्ये संसारोपयोगी साहित्याबरोबरच काही पाळीव जनावरेही होती. या अपघातात काही जनावरांचाही मृत्यू झाला आहे. मात्र, ट्रक चालक या दुर्घटनेतून बचावल्याची प्राथमिक माहिती समोर आली आहे.
अपघाताचा मोठा आवाज ऐकताच स्थानिक ग्रामस्थांनी तातडीने घटनास्थळी धाव घेत बचावकार्य सुरू केले. दोन गंभीर जखमींना तातडीने सातारा जिल्हा रुग्णालयात दाखल करण्यात आले असून त्यांच्यावर उपचार सुरू आहेत.
घटनेची माहिती मिळताच सातारा तालुका पोलिसांनी घटनास्थळी धाव घेतली. स्थानिकांच्या मदतीने मृतदेह दरीतून बाहेर काढून शवविच्छेदनासाठी पाठवण्यात आले आहेत. अपघाताचे नेमके कारण शोधण्यासाठी पोलिसांकडून पुढील तपास सुरू आहे.
