बांगलादेश: बांगलादेशमध्ये आज 21 नोव्हेंबर रोजी सकाळी 10 वाजता 5.7 रिश्टर स्केलचा भूकंप झाला. भूकंपाचे केंद्र राजधानी ढाकापासून फक्त 25 किलोमीटर अंतरावर असलेल्या नरसिंगडी येथील माधाबादीत होते. यामध्ये सहा जणांचा मृत्यू झाला आणि 200 हून अधिक जण जखमी झाले. मृतांची संख्या आणखी वाढण्याची शक्यता आहे. भूकंपाचा धक्का इतका जोरदार होता की दहा मजली इमारत एका बाजूला झुकली.त्याशिवाय सध्या बांगलादेशमध्ये बांगलादेश-आयर्लंड यांच्यात क्रिकेट सामनाही सुरू होता. तोही थांबवण्यात आला. स्थानिक माध्यमांच्या वृत्तानुसार पोलिसांनी आतापर्यंत 6 जणांच्या मृत्यूची पुष्टी केली आहे.
भूकंपानंतर कापड कारखान्यात चेंगराचेंगरी
गाझीपूरमधील श्रीपूर येथे भूकंपादरम्यान एक मोठा अपघात झाला. बहुमजली इमारतीतून बाहेर पडण्याचा प्रयत्न करणाऱ्या घाबरलेल्या कामगारांनी चेंगराचेंगरी केली, ज्यामुळे 150 हून अधिक कामगार जखमी झाले. डेनिमेक नावाच्या कापड कारखान्यात ही घटना घडली. जखमींना श्रीपूर उपजिल्हा आरोग्य केंद्रात दाखल करण्यात आले आहे. भूकंप झाल्यानंतर अधिकाऱ्यांनी कारखान्याचे मुख्य गेट उघडण्यास नकार दिल्याची तक्रार कामगारांनी केली आहे, ज्यामुळे घबराट पसरली आणि त्यामुळे अधिक जखमी झाले.
10 महिन्यांच्या मुलीचा मृत्यू
भूकंपात नारायणगंजच्या रूपगंज उपजिल्हा येथे भिंत कोसळून 10 महिन्यांच्या मुलीचा मृत्यू झाला. मुलीची आई आणि शेजारी जखमी झाले आहेत आणि सध्या उपजिल्हा येथील एका खाजगी वैद्यकीय महाविद्यालयाच्या रुग्णालयात त्यांच्यावर उपचार सुरू आहेत. मुलीच्या आईने द डेली स्टारला सांगितले की, “भूकंपाचा धक्का जाणवताच मुलीची आई तिच्या मुलीसह घराबाहेर पळून गेली. ते जवळच असलेल्या तिच्या आईच्या घरी जात असताना, रस्त्याच्या कडेला असलेली भिंत अचानक त्यांच्यावर कोसळली.” एका पोलिस अधिकाऱ्याने सांगितले की, मुलीचा जागीच मृत्यू झाला.
1762 मध्ये आलेला सर्वात मोठा भूकंप
बांगलादेशला 1762 मध्ये आलेला सर्वात मोठा भूकंप होता. त्याची तीव्रता रिश्टर स्केलवर 8.5 होती. याला ‘ग्रेट अराकान भूकंप’ म्हणून ओळखले जाते. त्यामुळे बांगलादेशातही मोठे नुकसान झाले होते. बांगलादेशमधील आलेल्या भूकंपानंतर कोलकातामध्येही भूकंपाचे धक्के जाणवले. स्थानिकांच्या मते, हे धक्के सुमारे 20 सेकंदांसाठी होते. रिश्टर स्केलवर त्याची तीव्रता 5.2 होती. आतापर्यंत कोणतेही नुकसान झालेले नाही. कूचबिहार, दक्षिण दिनाजपूर, मालदा आणि नादिया येथील अनेक भागात भूकंपाचे धक्के जाणवले. भूकंपाचे केंद्र बांगलादेश असल्याचे वृत्त आहे.
