अमरेली : एका ८ वर्षांच्या मुलाच्या पापणीतून तब्बल ३० जिवंत किडे आणि ३५ हून अधिक अंडी बाहेर काढण्यात आली आहेत. गुजरातच्या अमरेली जिल्ह्यातील सावरकुंडला येथील लल्लूभाई सेठ आरोग्य मंदिर हॉस्पिटलमध्ये दीड तासाच्या गुंतागुंतीच्या शस्त्रक्रियेनंतर हे किडे आणि अंडी यशस्वीरीत्या काढण्यात आली.
सावरकुंडला येथील १०० टक्के मोफत मल्टिस्पेशालिटी हॉस्पिटलमध्ये नुकताच नेत्ररोग विभाग सुरू झाला आहे. डोळ्यात दुखत असल्याची तक्रार घेऊन आलेल्या या ८ वर्षांच्या मुलाची याच विभागात तपासणी करण्यात आली. डॉ. मृगांक पटेल यांनी तपासणी केली असता, मुलाच्या पापणीत परजीवी म्हणजेच सामान्य भाषेत ज्यांना डोक्यातील उवा म्हणतात, ते असल्याचे निदान झाले. विशेष म्हणजे, इंजेक्शन न देता फक्त ड्रॉप्सच्या मदतीने ही गुंतागुंतीची शस्त्रक्रिया करण्यात आली, असे डॉक्टरांनी सांगितले. या शस्त्रक्रियेत सुमारे ३० परजीवी किडे आणि ३५ अंडी बाहेर काढण्यात आली. लहान मुलांमध्ये अशी प्रकरणे सामान्यपणे दिसत नाहीत.
