नवी दिल्ली : उपराष्ट्रपतीपदाच्या निवडणुकीपूर्वी एक महत्त्वाची राजकीय घडामोड घडली आहे. आंध्र प्रदेशचे माजी मुख्यमंत्री जगन मोहन रेड्डी यांच्या नेतृत्वाखालील वायएसआर काँग्रेस पक्षाने (YSRCP) एनडीएचे उमेदवार सी.पी. राधाकृष्णन यांना पाठिंबा जाहीर केला आहे. या निर्णयामुळे सत्ताधारी राष्ट्रीय लोकशाही आघाडीला (NDA) 9 सप्टेंबर 2025 रोजी होणाऱ्या उपराष्ट्रपतीपदाच्या निवडणुकीसाठी मोठी बळकटी मिळाली आहे.
वायएसआर काँग्रेसचा पाठिंबा
वायएसआर काँग्रेसचे लोकसभा खासदार मदिला गुरुमूर्ती यांनी या वृत्ताला दुजोरा देत सांगितले की, “आमच्या पक्षाने एनडीएचे उपराष्ट्रपतीपदाचे उमेदवार सी.पी. राधाकृष्णन यांना पाठिंबा देण्याचा निर्णय घेतला आहे.” पक्षाचे 11 खासदार (लोकसभेत 4 आणि राज्यसभेत 7) राधाकृष्णन यांना मतदान करतील. यामुळे एनडीएच्या एकूण मतसंख्येत 11 मतांची भर पडेल, ज्यामुळे त्यांचे एकूण मत 437 पर्यंत जाण्याची शक्यता आहे.
राजनाथ सिंह यांचे प्रयत्न
केंद्रीय संरक्षणमंत्री राजनाथ सिंह यांनी 13 ऑगस्ट रोजी जगन मोहन रेड्डी यांच्याशी फोनवरून संपर्क साधून राधाकृष्णन यांच्या उमेदवारीसाठी पाठिंबा मागितला होता. यानंतर वायएसआरसीपीने आपल्या खासदारांशी चर्चा करून हा निर्णय घेतला. विशेष म्हणजे, वायएसआर काँग्रेस हा ना एनडीएचा भाग आहे, ना इंडिया आघाडीचा. तरीही, पक्षाने यापूर्वी राष्ट्रपतीपदासाठी रामनाथ कोविंद आणि द्रौपदी मुर्मू यांना तसेच उपराष्ट्रपतीपदासाठी वेंकय्या नायडू आणि जगदीप धनखड यांना पाठिंबा दिला होता.
इंडिया आघाडीचा उमेदवार कोण?
दुसरीकडे, इंडिया आघाडी आपला उमेदवार जाहीर करण्याच्या तयारीत आहे. सूत्रांनुसार, तामिळनाडूच्या सत्ताधारी द्रविड मुनेत्र कळघम (DMK) पक्षाचे राज्यसभा खासदार तिरुची शिवा यांना उमेदवारी देण्याचा विचार सुरू आहे. तिरुची शिवा हे द्रविड पक्षाचे ज्येष्ठ नेते आणि रणनीतीकार मानले जातात. ते दिल्लीत पक्षाची धोरणे ठरवण्यात महत्त्वाची भूमिका बजावतात आणि संसदेत पक्षाची भूमिका स्पष्ट करतात.
एनडीएने तामिळनाडूतील माजी भाजप नेते सी.पी. राधाकृष्णन यांना उमेदवारी देऊन द्रविड पक्षाला कोंडीत पकडण्याचा प्रयत्न केला आहे. द्रविड पक्षाने तामिळनाडूतून उमेदवार न दिल्यास त्यांच्यावर ‘तामिळ विरोधी’ असल्याचा आरोप होऊ शकतो, तर तामिळ उमेदवार दिल्यास इंडिया आघाडीतील एकजुटीवर परिणाम होऊ शकतो. याशिवाय, तृणमूल काँग्रेसने गैर-राजकीय व्यक्तीला उमेदवारी देण्याची मागणी केली आहे, ज्यामुळे माजी इस्रो शास्त्रज्ञ मायलस्वामी अन्नादुराई यांचेही नाव चर्चेत आहे.
