Gujarat Ambulance Fire: गुजरातमध्ये भीषण दुर्घटना घडली आहे. अरावली जिल्ह्यात सोमवारी रात्री उशिरा एका चालत्या रुग्णवाहिकेला अचानक आग लागून एक दिवसाचे नवजात बाळ, त्याचे वडील, एक डॉक्टर आणि नर्स अशा चार जणांचा मृत्यू झाला. ही घटना मोडासातील रणसायद चौकाजवळ घडली. अहमदाबादच्या ऑरेंज हॉस्पिटलची ही रुग्णवाहिका प्रसूतीनंतर गंभीर अवस्थेतील बाळाला पुढील उपचारांसाठी अहमदाबादला घेऊन जात होती. दरम्यान, मोडासातून जात असताना गाडीत अचानक आग भडकली. पुढच्या सीटवर बसलेला चालक आणि एक नातेवाईक हे कसाबसा बाहेर पडून वाचले. मात्र रुग्णवाहिकेचा मागील भाग काही क्षणांत जळून खाक झाल्याने डॉक्टर, नर्स, बाळाचे वडील आणि नवजात बाळ यांना बाहेर पडता आले नाही.
घटनेनंतर स्थानिक नागरिकांनी तत्काळ मोडासा महानगरपालिकेच्या अग्निशमन दलाशी संपर्क साधला. पथकाने घटनास्थळी धाव घेत प्रचंड प्रयत्नांनंतर आग आटोक्यात आणली. दरम्यान, पोलिसांनी जखमींना तातडीने रुग्णालयात हलवले. या भीषण घटनेचे सीसीटीव्ही फुटेजही समोर आले असून पेट्रोल पंपाजवळ रुग्णवाहिका जळत असल्याचे त्यात दिसते.
हेही वाचा –नवले पुलावर भीषण अपघात; दोन ट्रकला आग, कार अडकल्याने 7 जणांचा मृत्यू
घटनेत मृत्युमुखी पडलेल्या नर्सची ओळख 22 वर्षीय भाविकाबेन रमनभाई मानत अशी झाली असून मृत डॉक्टराचे नाव राज शांतीलाल रेंटिया (35) आहे. दोघेही हिम्मतनगरजवळील चिथोरा गावातील रहिवासी असून अहमदाबादमधील एका रुग्णालयात कार्यरत होते. नवजात बाळही आगीतून सुटू शकले नाही. बाळाचे वडील गंभीर जखमी झाल्याची माहिती समोर आली आहे. ही आग नेमकी कशी लागली याचा तपास स्थानिक पोलिसांनी सुरू केला आहे. प्राथमिक अंदाजानुसार तांत्रिक बिघाड किंवा शॉर्ट सर्किटमुळे ही दुर्घटना घडली असावी. मात्र अधिकृत कारण तपासानंतरच स्पष्ट होणार आहे.
मोदासासारख्या शांत परिसरात घडलेल्या या घटनेने परिसरातील नागरिक, मृतांच्या कुटुंबीयांपासून ते रुग्णालयातील कर्मचाऱ्यांपर्यंत सर्वांना मोठा धक्का बसला आहे. जीवन वाचवणारी रुग्णवाहिकाच मृत्यूचे कारण ठरल्याने सुरक्षा व्यवस्थेबाबत गंभीर प्रश्न पुन्हा एकदा उभे राहिले आहेत.
